Ny taona 2023, nametraka tahiry ny Unicef hiadiana amin’ny tsy fanjarian-tsakafo eo amin’ny ankizy sy ny reny, indrindra hisorohana ny tranga eo amin’ny ankizy latsaky ny 5 taona.
Noho ny fihenan’ny vola natokan’ny mpamatsy izany ho an’ny ady amin’ny tsy fanjarian-tsakafo, mahatratra 14 tapitrisa ny zaza sy ankizy maneran-tany no tsy hisitraka intsony ny tohana ara-tsakafo sy ny tolotra azon’izy ireo hatramin’izay. Mety hitarika amin’ny tsy fanjarian-tsakafo mahery vaika sy ny fahafatesana mihitsy izany, araka ny tatitra navoakan’ny Unicef tao anatin’ny fihaonana an-tampony momba ny fanjarian-tsakafo ho an’ny fitomboana (N4G) tany Paris, ny herinandro lasa teo. Mitombo anefa ny ankizy tratran’ny olana ara-tsakafo amin’izao fotoana izao noho ny ady miseho, ny vokatry ny fiovan’ny toetr’andro ary ny fisehoan’ny valanaretina samihafa mamparefo ny fisian’ny antoka ara-tsakafo amin’ny firenena maro.
Nanomboka ny taona 2000 no ho mankaty, noho ny ezaka niraisana vita, nihena ny isan’ny zaza tratran’ny tsy fanjarian-tsakafo sy olana eo amin’ny fitomboana. Rava avokoa ireo ezaka ireo rehefa nahena ny sora-bola hanohanana ny ady ho an’ny fanjarian-tsakafo ka firenena 17 no tena hizaka ny vokatr’izany fanapahan-kevitra izany. Tsy afaka hanome ny sakafo sady fanafody hitsaboana ny zaza voan’ny tsy fanjarian-tsakafo mahery vaika lalina mahatratra 2,4 tapitrisa intsony hatramin’ny faran’ny taona satria tsy ampy ny vola ampiasaina.
Eto Madagasikara, zaza 500 000 no ahina ho tratran’ny tsy fanjarian-tsakafo mahery vaika amin’ity taona ity. Nampitondra takaitra ny tapany atsimo ny rivodoza nandalo tany farany teo, ka mamparefo ny tokantrano maro efa sahirana.
Niezaka nanao haitaky hampiakarana ny sora-bola ho an’ny fanjarian-tsakafo ny solontenan’ny firenena nandray anjara tamin’ny N4G, satria ny fampiasana vola 1 dolara ho an’ny fanjarian-tsakafo dia miteraka vokatsoa sandaina 23 dolara.
Vonjy
French