TARATRY ny KANTO

Notokanana nandritra ny Alahamadibe teo, ny Zomban’i Marololo, ao amin’ny vohitr’Andrainisisa, any Ankadivoribe. Nanaraka antsakany sy andavany ny fomba amam-panao rehetra izany, izay nokarakarain’ny fikambanan’ny Zanadrano Mpikaroka Raokandro, tarihin-dRandrianantenaina Jean Emickaël. Nisy ny fizarana ny nofon-kena mitam-pihavanana, ny zara hasina, sns, ankoatra ny tsodrano sy ny fanao rehetra rehefa Alahamadibe.
“Aza manao vinany, fa feno fandrika ny tany”. Io ny lohatenin’ny hira vaovaon’ny tarika mpanao hiragasy Rasoalalao Kavia avy eny Ampahimanga, izay notokanana ny alatsinainy teo. Hisantatra izany mandritra ny ady hiragasy, hifanandrinany amin-dry Rateloson avy eny Andohavary izy ireo, ny 5 avrily izao, any Antanetibe Mahazaza.
Handray anjara amina hetsika ho fiaraha-mientana mba hanampiana an’i Ghost ireo namany. Hisy, araka izany, ny seho iarahan’ireo mpanao rap, ny sabotsy 5 avrily izao manomboka amin’ny 2 ora, eny amin’ny No Comment Bar Isoraka. Hifandimby an-tsehatra eo ry Buddha El Taga, Vy mamay, Doublenn, Mista, Big Jim Da, Abt, 8 Mm, Jentily, Tolo Shakespear, sns.
Ho vahinin’i Samoëla, mandritra ny “Zara Revy”, ny alahady 6 avrily izao, i Tselonina sy Ifanihy. Hialohavan’ny vazo miteny, araka izany, ity fampisehoana goavana ity. Manome sehatra ireo nialoha lalana, sady ho valim-babena no famaliana ny hetatehan’ireo mpankafy i Samöela.