VAOVAO TAMBATRA

Miisa 300 ny mpiasan’ny minisiteran’ny Asa vaventy, nanao Hetsika tanamaro (Himo), omaly. Nisy ny fanadiovana nanomboka teny Antaninarenina hatrany Tsaralalana. Hetsika nanatsarana ny endriny ny tanàna sady handraisana ireo vahiny hiatrika ny fivoriamben’ny COI eto Antananarivo. Hatao ny 21 na 22 avrily ho avy izao ny hetsika fanindroany.
Higadona androany eny amin’ny seranam-piaramanidina Ivato ilay ATR-72, hanampy isa ny fiamanidin’ny kaompania Madagascar Airlines. Tanjona ny hamerenana amin’ny laoniny ny fitantanam-bola amin’ny alalan’ny tohana mitentina 35 tapitrisa dolara omen’ny Banky iraisam-pirenena. Kendrena ny hanarenana haingana ny kaompania.
Nisokatra nanomboka omaly ny jono mahaloky rehefa nikatona nandritra ny telo volana. Nahatratra 30 taonina ny vokatra azo tao amin’ny helodranon’i Tsimipaika, nosy Faly, faritra Diana, tamin’ny telo taona lasa. Nidina 18 taonina izany taorian’ny fandalovan’ny rivodoza Gamane.
Mitentina 10 miliara Ar ny vola natokana hanarenana ny lalana ao an-tampon-tanànan’i Toamasina. Mandeha tsara ny asa, araka ny lamina napetraka. Tanjona, ny hanatsarana ny lalana simba ao an-toerana, mialoha ny hahatongavan’ny fialantsasatra lehibe. Eo koa, anefa ny fandraisana ny mpizahatany vahiny amin’izao fotoana izao.