Rano fisotro madio anaty tavoahangy voalohany eto Madagasikara ny marika Eau vive. Niforona tamin’ny taona 1970 ny orinasa Société d’exploitation des sources d’eaux minérales d’Andranovelona (Sema), ao anatin’ny Vondrona Star.
Tsy nitsahatra nivoatra manaraka ny toetrandro nandritra izay 55 taona izay ny orinasa. Vokatra azo antoka satria hentitra ny fanaraha-maso, nitandro ny kalitao, ka nahazoany ny mari-pamantarana ara-kalitao maro (Iso 9001, Iso 14001, Iso 45001 ary FSSC 22000). Satria tanjona ny famaliana ny filan’ny mpanjifa, manamarin-toerana azy eo amin’ny tsenan’ny rano fisotro eto an-toerana sy any ivelany.
Nahazo fankasitrahana sy amboara iraisam-pirenena ny marika Eau Vive, hatrany amin’ny Grand Gold Award avy amin’ny Monde selection, izay vondrona mahaleo tena manombana ny kalitaon’ny vokatra maneran-tany sady manaraka ny fepetra ara-tsiantifika isan-karazany.
Mahatratra 110 000 isan’andro ny rano fisotro anaty tavoahangy vokarin’ny orinasa Sema, miparitaka any amin’ny toera-pivarotana maherin’ny 25 000. Tsy mitsahatra ny fanitarana sy ny fanavaozana ataon’ny orinasa.
Ankoatra ny famokarana ara-toekarena, mandray andraikitra amin’ny sosialy (RSE) ihany koa ny Sema sy ny Star. Nisy ny fametrahana jiro manazava ny tanàna eny Andranovelona, ny taona 2024. Nametraka toerana fanasan-damba sy famatsian-drano fisotro no natao tamin’ity taona ity, ka miisa 70 ny tokantrano misitraka izany ahitana mponina maherin’ny 1 300 eny an-toerana.
Njaka A.
French