Nohamafisin’ireo kaominina voakasiky ny tetikasa Base Toliara, ao amin’ny distrika Toliara II (Ankilimalinike, Tsianisiha, Maromiandra ary Belalanda), ny fanohanany ny orinasa Base Toliara. Nambaran’ny ben’ny Tanàna Maromiandra, i Felix, fa nanohana hatrany ity tetikasa ity ny tenany hatramin’ny nanombohany mandrak’ankehitriny. Nanao antso avo ho an’ny Base Toliara izy mba tsy hihemotra manoloana ny fanakorontanana politika. Nentaniny ny mponina tsy ho voarebirebin’ireo mpanohitra ny tetikasa, sady manely vaovao tsy marina.
Any Ankilimalinike ny faritra tena hitrandrahan’ny Base. Nilaza ny ben’ny Tanàna ao an-toerana, i Tsimiavotse Maximin, fa « izahay no hisitraka voalohany ny tombontsoa entin’ity tetikasa ity, indrindra ny tanora izay tsy an’asa, ankehitriny ».
Miandry fatratra ny hanombohan’ny tetikasa ireo kaominina efatra ireo. Anisan’izany ny fananganana fotodrafitrasa toy ny sekoly, ny toeram-pitsaboana, ny famatsian-drano fisotro madio, sns. Tantsaha ny ankamaroan’ny mponina any an-toerana. Hanampy betsaka azy ireo ny fanajariana ny lakandrano ho an’ny fambolena sy ny fiompiana.
Nilaza ny ben’ny Tanàna Belalanda, Raherisoa Mampasia, fa « niady mafy ny hanokafana indray ny tetikasa izahay, ka tsy maintsy arovanay ny tombontsoan’ny vahoaka ».
Njaka A.
French