Handray fampirantiana marolafy anisan’ny lehibe indrindra ny Fondation H. Ho avy hitondra ny « Safiotra » ao i Yinka Shonibare, miaraka amin’ireo vahiny sy Malagasy manan-talenta sy manampahaizana hafa, hihodidina ny lohahevitra amin’ny alalan’ny kanto sy ny tafa.
«Safiotra » [Hybridités/Hybridities]. Io indray no anaran’ny fampirantiana goavana sy iraisam-pirenena horaisin’ny Fondation H, manomboka ny 11 avrily izao. Sanganasan’ilay mpanakanto marolafy nizerianina, Yinka Shonibare izy ity, ary andrasana ho avy eto Antananarivo ihany koa izy hizara izany. Maneho izay « Safiotra » izay avokoa, indrindra ny fifangaroan’ny olombelona, ny kolontsaina ary fomba fiaina amin’ny ankapobeny eo amin’ny afrikanina sy ny eoropeanina ny fampirantiana. Haranty manokana mandritra izany ny « Refugee Astronaut X », fitambaran’ireo sokitra maro natao manokana ho an’i Madagasikara.
Efa nanomboka omaly ny fanomanana ny toerana ao amin’ny Fondation H. Ankoatra ireo sanganasan’i Shonibare, misy dian-tanan’ireo afrikanina mpanakanto hafa miisa 19 koa anatin’ity fampirantiana goavana ity. Mifandrohy amin’izay fiainana nialoha ny fanjanahan’ny eoropeanina taty Afrika, sy ny naterak’izany taty aoriana avokoa ireo. Miara-dalana amin’ny fampirantiana, misy koa ireo hetsika maro manodidina izany.
Hisy ny velakevitra ao amin’ny IFM Analakely, ny 11 avrily amin’ny 3 ora sy sasany tolakandro. “Les voix de Safiotra” ny lohahevitra, izay handraisan’ireo olona maro voakasika akaiky amin’ity hetsika ity anjara. Hitarika izany i Yinka Shonibare, miaraka amin’i Gus Casely-Hayford (Talen’ny V&A East, Londres, Royaume-Uni), Smooth-Ugochukwu C. Nzewi (Conservateur au Département de Peinture et Sculpture du Museum of Modern Art, New York, Etats-Unis). Handrindra ny fotoana i Margaux Huille (talen’ny Fondation H), ary hampiditra ny adihevitra kosa i Hassanein Hiridjee (filohan’ny Fondation H).
Hitohy amin’ny seho marolafy, izay hotarihin’i Harivola Rakotondrasoa, mpamorona soradihy sady tale ara-javakanton’ny tetikasa DIHT izany. Hanatontosa kosa i Lalaina Rafanomezantsoa (hira sy dihy), Marin Dementhon (Hip-Hop), Thug X (Krump) ary i Manankasina Rajaonarivony (slam poetry).
Ny sabotsy 12 avrily amin’ny 11 ora kosa ny fampahafantarana voalohany ilay boky “Lova”, notontosain’ilay mpanakanto mpaka sary ivoarianina François-Xavier Gbré. Anisan’ireo nanoratra tao anatin’izany i Nasolo-Valiavo Andriamihaja na i Vanf. Arahin’ny fampisehoana “kabary hybride” izany amin’ny 2 ora tolakandro. Kabary nentim-paharazana laroina amin’ny ankehitriny, amin’ny teny malagasy, frantsay ary anglisy. Haneho ny talentany amin’izany ilay mpanao slam Orad.
Miverina amin’ny adihevitra matotra kokoa indray amin’ny 2 ora sy sasany, manodidina ny lohahevitra “Safiotra” hatrany. Hitarika izany i Tamsin Hong, mpandrindra fampirantiana avy ao amin’ny Serpentine Gallery, any Londres. Hifarimbona aminy ny Profesora Razafindratsimba Dominique, talen’ny « Centre de recherche et d’études sur les constructions identitaires » eny amin’ny Oniversiten’Antananarivo, Profesora Ranjatohery Lala, akademisianina sady mpahay tantara ary i Vanga, poeta sady antropology.
Zo ny Aina
French