Tanterahina mandritra ny telo andro, ny 2 ka hatramin’ny 4 avrily, eny amin’ny Ecoles internationales Maarif-Madagascar, Talatamaty, ny «Salon de l’orientation» andiany voalohany. Hetsika hampahafantarana sy hanomezana torolalana momba ny sehatrasa miandry ireo mpianatra aorian’ny fianarana ataony. Misokatra maimaimpoana ho an’ny rehetra ny hetsika izay hanasana ireo mpianatra avy amin’ny sekolim-panjakana maniry te hisitraka torolalana sy hahalala ireo dingana samihafa hanohizana fianarana any Torkia.
Misy ny lohahevitra hovoaboasana mandritra izany. «Tafiditra ao anatin’izany ny fifaninanana ahafahana misitraka vatsim-pianarana mankany Torkia», hoy ny tomponandraikitry ny sekoly, Andrianjatovo Solonirina Onjaniaina. Hizara ireo torolalana ho an’ireo mpianatra maniry hanohy fianarana any Torkia kosa ny solontenan’ny minisiteran’ny Tanora sy ny fanatanjahantena (MJS), androany. Marihina fa mikarakara ity «Salon de l’orientation» andiany voalohany ity ny Ecoles internationales Maarif-Madagascar sy ny Fondation Maarif de Turquie.
Henintsoa H.
French