Namoaka fanambarana ny eo anivon’ny masoivohon’i Madagasikara ao Paris, omaly, manoloana ny hetsika nataon’ireo teratany malagasy, Diaspora, tany an-toerana. Tsy mitombina ireo vaovao niely.
“Manamafy sy mandiso tanteraka ny vaovao diso misy manaparitaka ao amin’ny tambajotran-
tserasera izahay ka milaza fa nisy fihoaram-pefy sy fidirana an-keriny tao amin’ny masoivoho”, hoy ny fanambarana. Mitohy tahaka ny mahazatra ny asa sy ny andraikitra sahanin’ny masoivoho any an-toerana. Tsy nisy fanelingelenana na fikorontanana nahatonga fanohintohinana amin’ny fampandehanana izany, araka ny fanambarana hatrany.
Notsiahivin’ny fanambaran’ny ambasady malagasy fa nisy andiana olona tonga nametraka fangatahana fihaonana amin’ny masoivoho. “Noraisina sy notanterahina araka ny fenitra diplaomatika izany ary izy ireo ihany no nanao fanambarana tamin’ny alalan’ny tambajotran-tserasera”, hoy ihany ny fanambarana.
Manameloka tanteraka ny fielezan’ny vaovao tsy marina sy ny finiavana hanakorontana amin’ny alalan’ny fanentanana sy fampirisihana amin’ny hetsika fanelingelenana samihafa ny masoivoho, amin’ny maha solontenan’ny Repoblikan’i Madagasikara azy.
Fampiharana ny demokrasia
Etsy andaniny, nilaza ho manaraka akaiky ny toe-draharaham-pirenena eto Madagasikara ireo diaspora mivondrona eo anivon’ny Firaisankina ho an’ny fahalalahan’i Madagasikara (Coli).
Nambaran’ireto nanao hetsika ireto fa nangataka fihaonana tamin’ny masoivohon’i Madagasikara any Frantsa, tao Paris, izy ireo.
Tanjon’ny fangatahana fihaonana ny mba hitondran’ny ambasadaoro miasa sy monina any Frantsa ny fangatahan’izy ireo any amin’ny filoha Rajoelina Andry. “Mifototra amin’ny fampiharana ny tany tan-dalàna sy ny fanajana ny zon’olombelona ary ny fampiharana ny demokrasia aty Madagasikara izany”, hoy izy ireo.
Synèse R.
French