Mampiasa fiaramanidina dimy, ankehitriny, ny Madagascar Airlines handrakofana ny sidina anatiny. Noraisina tamin’ny fomba ofisialy omaly, teny amin’ny seranam-piaramanidina Ivato, ny ATR 72 iray faharoa amin’ny loko ahafantarana ity kaompania nasionaly ity.
Taorian’ny fiovam-pitantanana nisy teo anivon’ny Madagascar Airlines ny volana janoary 2024, zara raha fiaramanidina roa amin’ny enina hananan’ny kaompania no nanatanteraka ny sidina anatiny. “Naato ireo fiaramanidina noho ny tsy fahampian’ny famatsiam-bola hiantohana ny fikojakojana sy fanamboarana azy ireo”, hoy ny tale jeneralin’ny Madagascar Airlines, i Thierry de Bailleul, omaly, teny Ivato. Napetraka, araka izany, ny drafi-panarenana ny orinasa “Phénix 2030”. Hofain’ny Madagascar Airlines ireo fiaramanidina efatra miasa ankehitriny ireo. Fananan’ny kaompania novidina kosa ny iray.
Vina
“Tanjon’ny Madagascar Airlines ny hampitombo ho fito ireo fiaramanidina miasa hatramin’ny taona 2026”, hoy ny tale jeneralin’ny kaompania. Nambaran’ny minisitry ny Fitaterana sy ny famantarana ny toetr’andro, Ramonjavelo Valery, fa “mila fiaramanidina 11 na 12 eo ho eo isika raha hanamafy ny sidina anatiny”.
Vina napetraky ny fitondram-panjakana ny handray mpizahatany 1 tapitrisa amin’ny taona 2028.
Ankoatra ny fandraisana fiaramanidina hanamafy ny sidina anatiny, nitombo ho enina isan-kerinandro ny sidina iandraiketan’ny Emirates, miala avy any Dubai mankaty Madagasikara, manomboka amin’ity herinandro ity, raha dimy izany teo aloha. Hampiakatra ny isan’ny sidina ho 17 isan-kerinandro ihany koa ny Ethiopian Airlines avy any Addis-Abeba, manomboka ny volana mey, raha toa ka 11 izany amin’izao fotoana izao.
Marihina fa tafiditra ao anatin’ny drafi-panarenana Phénix ny hamerenana amin’ny laoniny ny toe-draharaha sy hamahana ny olana sedrain’ny kaompania Madagascar Airlines.
Henintsoa Hani
French