“Very tanteraka ny hasina sy soatoavina eo amin’ny samy Malagasy ankehitriny”, hoy Randriambao Edmond, mpiasan’ny Fahasalamana efa misotro ronono. Mananika ny faha-90 taona izy ankehitriny. Tsy misy intsony ny fifampitsinjovana sy fandalinana ny maha iray tampo amin’izao fotoana, raha ny fanazavany. «Mifanary velon’aina, eny misy hatramin’ny tsy mifandevi-maty isika noho io fahasimban’ny kolontsaintsika io », hoy izy. Voazarazaran’ny fitiavam-bola, voninahitra hatramin’ny harena ny ankamaroan’ny Malagasy ka lasa manao tsinontsinona ny nahitana masoandro aza, araka ny fanamafisany. « Tsy nahazo nandevina ny rahalahiko izay mpiray tampo amiko akory aho. Voahilikilika ny fianakaviana fa ny zanany ihany no nikarakara azy », hoy ity raim-pianakaviana ity izay namoy ny kambana aminy ny volana marsa lasa teo. Tsy nisy fifamaliana, saingy heveriny ho toy ny fanitsakitsahana ny maha Malagasy izany. “Ny Malagasy izay tsy miady amim-paty”. « Aiza ho aiza ny fihavanana, ny firaisankina izay niombonan’ny Malagasy fahiny », hoy ity raim-pianakaviana ity.
Tsiferana R.