Nodimandry teo amin’ny faha-65 taonany i Val Kilmer. Mpilalao sarimihetsika malaza maneran-tany, nalaza voalohany tao anatin’ilay sarimihetsika “Top Gun”, izay niarahany tamin’i Tom Cruise, izy. Nisongadina avy eo tamin’ny “Heroic fantasy Willow”, “Coeur de tonnerre”, “True romance”, “Tombstone”, “Bad lieutenant”, sns. Homamiadan’ny tenda, izay efa tsy nampiteny azy fotoana ela no voalaza fa nitarika ny fahafatesany.
Afapo ireo nanatrika ny velakevitra tetsy amin’ny Tranombokim-pirenena, omaly. Niresahana ny « Boky sy ny zon’ny mpanoratra : ny olana sy ny fanamby » izany, izay nitondran’ny talen’ny Omda fanazavana. Nifanampy nanatsikafona ny olana sy nitondra vahaolana ihany koa i Hobiana, mpanoratra sy Poeta. Teo koa Razafintsalama Marie Michelle, solontenan’ny trano mpamokatra boky.
Namoaka ny fandaharam-potoanany ny Mage 4. Nampahafantarina tamin’ny fomba ofisialy omaly, fa hanomboka ny taom-pampisehoana etsy amin’ny Arena Ivandry, ny 31 mey ny tarika. Handray anjara amin’ny « Festival Antsika Jiaby » eto Madagasikara, ny 4 mey, sy ny any Frantsa, ny 7 jona ihany koa izy ireo. Ankoatra izay, ny 14 desambra ilay fotoan-dehibe ao amin’ny Lapan’ny fanatanjahantena Mahamasina.
Nigadona any France omaly ry Njakatiana, Bodo, Gothlieb, sns. Anisan’ireo mpanakanto handray anjara amin’ny Rencontres nationales sportives na RNS fanao any an-toerana, izay ambohipihaon’ireo Malagasy milaravinahitra any France izy ireo. Ho goavana kokoa ny fanamarihana ny faha-50 taonan’ny RNS, ka hiampy ireo Malagasy mpanakanto monina any ivelany izany.
French