Hitondra ny raharaha eny anivon’ny tomponandraiki-panjakana mahefa ny fianakavian’ny ilay lehilahy 22 taona maty vokatry ny fitsaram-bahoaka, ny harivan’ny talata 01 avrily teo, tamin’ny 6 ora. Naka laza adina andrana tamin’ny namany tao Mangarivotra io tovolahy mbola mpianatra io tamin’ny fotoana voalaza. Nitrangana asa fanendahana tampoka tao an-toerana. Niantso vonjy ny lasibatra izay very telefaonina. Nitsoaka anefa ny nahavanon-doza. Nifanena tamin’ilay tovolahy 22 taona, io voaroba io sy ny fokonolona. Tsy nisy alaharo, avy hatrany dia nihazona azy ireo mpanara-dia. “Tsy nisy na inona na inona ankoatra ilay laza adina vao nalainy tamin’ ny namany teny amin’io tovolahy io”, araka ny nambaran’ ny fianakaviany. Niezaka nanazava tamin’ny fokonolona ho tsy nanao ny asa fanendahana, araka izany, ilay tovolahy. Nidaroka sady namono sy nanampatra ny ainy tamin’ilay tovolahy ny andian’olona nahasambotra azy. Tsy afa-namaly, tratry ny be no ho vitsy ka voa mafy izy. “Naratra mafy izy vao natolotra ny lehiben’ny fokontany”, hoy ny loharanom-baovao. Tapitra ny ainy rehefa nentin’ny polisy hamonjy hopitaly.
Mifanohi-kevitra
Tetsy ankilany, nanamafy ny lehiben’ny fokontany ao Mangarivotra Avaratra fa tena mpanendaka tokoa ity tovolahy niharan’ny fitsaram-bahoaka ity. Mihenjan-droa, araka izany ny tady eo amin’ny fianakaviany sy ny tomponandraikitry ny fokontany ao an-toerana. Manoloana ity tranga ity, tsy hanaiky ary hampiakatra ny raharaha eny anivon’ny manam-pahefana ny fianakavian’ny maty. Nanamafy rahateo ireto farany fa tsy mpanao asa ratsy ny zanak’izy ireo saingy maty noho ny hasomparana nataon’ny sasany. Andrasana ny fanadihadiana.
Sajo/Tsiferana R.
French