Nosalorana samboady, omaly, ireo ben’ny Tanàna miisa 14 voafidy tao amin’ny distrikan’i Mananjary, 28 avy amin’ny distrikan’i Ifanadiana ary 19 avy amin’ny distrikan’i Nosy Varika. Notanterahina teo an-tampo-tanànan’i Mananjary ny lanonana. Tonga nitarika izany ny filohan’ny Antenimierampirenena, Tokely Justin, sy ny loholona Rabemananjara Nicolas.
Nankatoavin’ny Rafitra ifotony fikaonandoha “SLC-R” ireo tetikasa miisa efatra ahitana fotodrafitrasa 12 amin’ireo distrika efatra, any Sava. Miompana amin’ny fanamboarana tohodrano ahafahana mamatsy ireo toeram-pambolena sy fanamboarana tetezana mampitohy kaominina maromaro izany.
Nigadona ao Toliary, omaly, ny Kly Fanampera. Nirary soa ho azy noho fiarovany sy ny fijoroany hiarovana ny tany, manoloana ny “Raharaha Base Toliara” ireo mpanohana sy mpanara-dia azy. Anisan’izany ny depiote Randrianasoloniaiko Siteny. Tsiahivina fa voaheloky ny fitsarana telo taona an-tranomaizina sazy mihantona ny tenany.
Mitohy ny asan’ny mpanentana kaominaly eny Ivato momba ny fampidiram-bola “Comité communal de recettes-CCR”. Mifanohana ny rafitra ifotony fifampidinihana SLC sy ny kaominina ary ny Prodécid/ GIZ amin’izany fanentanana izany. Natolotra ny kaominina Ivato, omaly ny fitaovana informatika hanamorana ny fanangonana hevitra.
French