Nanomboka ny alakamisy teo ny « Vues d’Afriques », andiany faha-41. Hetsika iraisam-pirenena hanasongadinana ny sarimihetsika afrikanina, any Canada, izy ity. Manana solontena amin’izany i Madagasikara, satria misy sarimihetsika notontosaina Malagasy mandray anjara amina sokajy telo; Ny “What if?” an’i Norohasimbola Julienne Rakotoharinivo ny voalohany, ao amin’ny sokajy “Fiction courts et moyen métrage”. Ny “Chez les zebus francophones” an’i Lova Nantenaina ny faharoa, ao amin’ny sokajy “Documentaire long métrage ». Fahatelo kosa ny « Omby – Zébu –Bull », an’i Kuro Mi, ao amin’ny sokajy « film d’animation ». Tsy mena-mitaha amin’ireo firenena afrikanina manana solontena amin’ity hetsika lehibe ho an’ny sarimihetsika ity i Madagasikara, araka izany.
Ankoatra izay, voafantina ho anisan’ny mpitsara ihany koa ny Dr Tsiky Rakotomavo. Tale misahana ny maha izy ara-kolontsaina eo anivon’ny minisiteran’ny Serasera sy ny kolontsaina, mpikambana eo anivon’ny Akademia Malagasy ary anisan’ny nandrindra ny atrikasa momba ny sarimihetsika aty amin’ny ranomasimbe Indianina .Voafantina ho anisan’ny mandrafitra ny vondron’ny mpitsara izy amin’ny maha matihanina azy eo amin’ny kolontsaina.
Ho fanamafisana izany, mbola hisy ny « Takariva Madagasikara », hatokana hanehoana ny kolontsaina mampiavaka ny Malagasy, mandritra ity hetsika ity. Hanamafy ny fifandraisana eo amin’i Canada, sy ireo mpisehatra ao amin’ny tontolon’ny kolontsaina ankapobeny sy ny sarimihetsika manokana izay mandray anjara amin’ny « Festival Vues d’Afrique » izany. Ny 13 avrily izao vao hifarana ny hetsika.
Zo ny Aina
French