Noraisin’ny praiminisitra, Ntsay Christian, teny Mahazoarivo, omaly, ny delegasiaonina mamita iraka eto Madagasikara avy amin’ny Tahirimbola iraisam-pirenena (FMI). Mitarika izany Constant Lonkeg, niaraka amin’ny solontena maharitra, miasa sy monina eto amintsika, Kodjovi Mawulikplimi Eklou.
Anisan’ny nifantohan’ny fifanakalozana teo amin’ny roa tonta ny momba ireo ezaka rehetra irosoana amin’ny fanatanterahana ny politika sy ireo tetikasa maro volavolain’ny fitondram-panjakana tarihin’ny filohan’ny Repoblika, Rajoelina Andry. Anisan’izany ny hanatsarana ny sehatry ny fampandrosoana mipaka amin’ny vahoaka. Teo koa ny fanaovana jery todika ny vokatry ny fiaraha-miasa eo amin’ny fitondram-panjakana sy ny FMI, ary ny fandinihana ireo stratejia entina hanamarinan-toerana hatrany ny toekarena eto Madagasikara.
Nifampidinihana tamin’izany koa ireo laharam-pahamehana hirosoan’ny fitondram-panjakana amin’izao fotoana izao. Tafiditra tao anatin’izany ny sehatry ny fambolena, ny angovo sy ny fampiroboroboana ny indostria. Manampy izany ny lafiny fitantanana ny raharaham-panjakana.
Naneho ny fahavononany hanamafy orina hatrany ny fametrahana ho vaindohan-draharaha ny tombontsoan’ny vahoaka malagasy ireto avy amin’ny mpamatsy vola, FMI, ireto.
Synèse R.
French