Nitondra fanazavana sy ny fahitany ny firosoan’ny tetikasa Base Toliara ny loholona Tsiebo Mahaleo.
Nohitsiny tamin’izany ny avy amin’ny mpanohitra.
“Lonilony politika sy alahelon-tseza ary fitadiavana tombontsoa manokana no ambadiky ny fanoherana ny tetikasa Base Toliara. An’ny kaominina dimy voakasik’io tetikasa io, vahoaka atao hoe 90 % dia manohana ary mangataka ny fanatanterahana azy.” Io ny fanehoan-kevitry ny loholona Tsiebo Mahaleo Richard Victor, manoloana ny fanoherana ny tetikasa Base Toliara. Tsy tongatonga ho azy ny hoe: maninona no mifanandrify amin’ny fiomanana ny fandraisana ny fihaonana an-tampon’ny Vaomieran’ny ranomasimbe Indianina (COI) no misy an’izao korontana izao? Hetsika fanakorontanana no misy amin’izao. Hanome endrika ratsy an’i Madagasikara ny tanjona tian-dry zareo hahatongavana. Satria hoe tsy milamina ny eto Madagasikara, tsy voafehy ny fandriampahaleman’ireo mpandry anjara amin’izany fihaonana izany.
Toy izay koa ny hanoherana ny tetikasa Tanamasoandro, ny lalana migodana Antananarivo-Toamasina. Ny eny Ambatolampy Tsimahafotsy, foronina ny lainga mba hitroatra ny olona. Nefa rehefa tonga ny fitondram-panjakana nanazava hoe tsy misy tanimbary voakasiky ny tetikasa eny dia nilamina. Ny mpanao politika manao izany, raha vao tsy izy no hoe eo amin’ny fitondrana: tsy maintsy voizina sy atao hatrany izay hikorontanan’ny tany sy ny fanjakana. Ny seza ipetrahany no tanindrazan’ireny olona ireny. Na inona na inona hahasoa ny vahoaka, tsy maintsy toheriny hatrany. Tsy ny fanjakana no toheriny fa ny fampandrosoana. “Aoka ny vahoaka tsy ho latsaka ao anatin’ny vela-pandrika na mety atao fitaovana hahazoan-dry zareo seza politika”, hoy izy.
R. Nd.
French