Miova lohahevitra ny fampirantiana eny amin’ny Mozean’ny saripika Anjohy. Miodidina ny rano sy ny toerana misy azy eo amin’ny fiarahamonina malagasy indray no hasongadina.
Rano… Iray amin’ireo singa tsy azo ihodivirana mandrafitra ny fiainana. Singa mamono sy mamelona, manana ny toerany lehibe ao anatin’ny tontolo. Mitodika amin’izay lohahevitra “Rano” izay ny fampirantiana eny amin’ny Mozean’ny saripika, eny Anjohy, nanomboka omaly. Izay maha zava-dehibe ny rano izay no nezahin’ny ekipan’i Helihanta Rajaonarison, mpitantana ny toerana, hasongadina. Efa naharitra enim-bolana izy ireo no niketrika izany. Natambatra hanome fampirantiana iray ireo sehakanto maro, na dia nisongadina indrindra aza ny saripika. Sary miisa 300, maneho vanim-potoana maro teto Madagasikara no notsongaina haranty ao. Maro amin’ireo no sanganasan-dRamilijaona, iray tamin’ireo namaky lay ny tontolon’ny saripika teto Madagasikara. Arahina fampahafantarana ireo fomba amam-panao mifototra amin’ny rano”, toa ny “Tsodrano”, ny “Fafy rano”, ny “Fandroana”, ny “Fitampoha”, sns, izany. Tsy nohadinoina ny toeran’ny rano notakarina avy amin’ireo oha-pitenenana fampiasa andavanandro, sy ireo renirano maro manerana an’i Madagasikara.
Niara-niasa tamina mpanakanto amin’ny sehatra hafa, toa an’i Gloria Rabarison, mpanao kanto vita amin’ny tanimanga ny Mozea. Misy horonantsary telo nosafidina, miresaka ny ranomasina sy ny Malagasy mivelona aminy koa, ohatra. Ankoatra izay ny teatra, izay hitondran’ny Compagnie Miangaly ny “Ranoro”, anio manomboka amin’ny 4 ora. Mialoha izay, hisy ny tafa sy dinika hotarihin’i Helihanta Rajaonarison, ny maraina.
Zo ny Aina
French