Muay Thai -Maître Gildas : “Mila manaraka ny fenitra iraisam-pirenena i Madagasikara”

Efa tafaverina eto an-tanindrazana ny Tale teknika nasionaly eo anivon’ny Federasionina malagasin’ny Muay Thaï, ny Maître Razanajatovo Gildas, rehefa niatrika fiofanana nandritra ny 45 andro tany Thailande. Nisy ny resadresaka natao taminy.

Gazety taratra (+): Tafaverina eto an-tanindrazana ianao, inona ny nentinao avy any Thailande ho an’ny taranja Muay Thai malagasy?

Razanajatovo Gildas (-) : Niatrika ny fiofanana nahazoana ny mari-pahaizana “Ins­tructeur 1” tany Thailande aho nandritra ny 45 andro. Zava-baovao maro no azoko tany ary mahatalanjona fa misy zava-diso maro hatao eto Madagasikara eo amin’ny taranja Muay Thai. Izany indrindra no hoentiko hampivoarana ity taranja ity. Tiako Raha mba hanaraka ny fenitra iraisam-pirenena ihany koa ny mpikatroka ny Muay Thai malagasy. Misy ny dingana arahina amin’ny Muay Thai ary any amin’ny fototra no tena mila hamafisina.

(+) : Nanao ahoana ny niatrehanao izay 45 Andro tany Thailande izay?

(-) : Tena mafy ny kotrana. Tsy vita mora saingy nilofosana dia vita ihany. Nanomboka tany amin’ny fototra mihitsy aho niaraka tamin’ireo mpampianatra ahy tao amin’ny Rangsit. Nahitsy avokoa ireo tsy nety tamin’ny teknika ary tena mahamenatra ny tsy fitovian’ny teknika saingy efa fantatro izao ny tokony hatao taorian’ny fiofanana natrehiko.

(+) : Nanao ahoana ny fandaharam-potoananao tany?

(-) : Feno tanteraka ny fandaharam-potoana, adiny 6 isan’andro no nikotrana nandritra izay iray volana sy tapany izany. Nisy ihany ny fanadinana natao teny antsefantsefany teny ho fampiharana ny kotrana ka izao nahazo ny mari-pahaizana “Instructor 1” izao.

(+) : Ahoana ny tohin’iny fiofanana iny?

(-) : Tsy maintsy zaraina amin’ny mpikatroka sy ny malagasy mpitsara ny fahalalana norantovina. Hisy ny fiofanana homena mialoha ny fiadiana ny ho tompondakan’i Mada­gasikara. Ho ahy manokana kosa, mbola hanohy ny fiofanana hahazoana ny mari-pahaizana “Instructor 2” sy “Instructor 3” aho amin’ny fotoana manaraka. Misaotra ireo nanohana ahy hatramin’izay aho, indrindra ny federasiona izay tarihin-dRako­toalizao Hainatiana Gervais.

F.R