Anio sabotsy vao ho fantatra ny anaran’ireo Makis de Madagascar, 12 mirahalahy, handeha hiatrika ny dingana faharoa amin’ny fiadiana ny “Challenger series”, taranja rugby lalaovina olona 7, sokajy lehilahy. Fihaonana hotanterahina any Krakow Pologne, ny 11 sy 12 avrily ho avy izao.
Raha ny fandaharam-potoana, hanainga rahampitso ny delegasiona malagasy. Tsiahivina fa ao amin’ny vondrona “B” no misy ny Makis amin’ity. Miaraka aminy ao i Canada sy i Portugal ary i Japon. Firenena efa fantatry ny mpilalaon’ny Makis avokoa ny roa amin’ireo dia i Portugal sy i Canada. Efa niray sokajy tamin’ny Malagasy mantsy izy ireo, nandritra ny dingana voalohany notanterahina tatsy Afrika Atsimo ny volana febroary lasa teo. Hanala vela izany ny Makis amin’ity.
Hidona voalohany amin’ny Makis rahateo ry zareo kanadianina. Aorian’io, hifampitana amin’i Portugal ary ny farany amin’i Japon. Miatrika ny lalao manasa-dalana izay 2 voalohany ary hiady laharana kosa ny fahatelo sy fahefatra.
Vonona ny mpilalaon’ny Makis de Madagascar, izay mbola niatrika lalao tsapa teny amin’ny Kianja Makis Andohatapenaka, omaly. Ny fanafainganana ny fanafihana sy ny tanjaka ara-batana no tena notakina tamin’ireo mpilalao. Marihina fa tonga nankahery sy nanolotra tohana ho an’ireo mpilalaon’ny Makis, ny alakamisy lasa teo, ny minisitry ny Tanora sy ny fanatanjahantena.
Tompondaka
French