Hisy ny « Train pascal » hampitohy an’i Fianarantsoa sy Sahambavy, ny alatsinain’ny paka. Iray ihany ny fiaingana, amin’ny 9 ora maraina, ary hiverina amin’ny 4 ora hariva ny lamasinina. Hampitohy ny garan’ ny FCE sy Beravina amin’ny saran-dalana 2 000Ar mandroso sy miverina kosa ny « petit train », ny 19-21 avrily.
Notokanana ny 3 avrily teo, ny birao sy toeram-pivarotana vaovao an’ny orinasa Soavoanio any Sambava. Ankoatra ny famokarana, manitatra ny fihariany amin’ny fanodinana ny voanio ara-indostrialy ihany koa ity orinasam-panjakana ity. Tanjona kendreny ny hanondranana ny vokatra any ivelany atsy ho atsy.
Nandray anjara tamin’ny fivoriambe tany Lusaka Zambia, ny Ader, Antokondraharaha misahana ny famatsiana herinaratra eny ambanivohitra, ny 1-4 avrily teo. Voakasik’izany ny lafiny famatsiana herinaratra madinika. Nisy ny fifanakalozana traikefa, araka ny Fifanarahana mahakasika ny angovo aty Afrika, ao anatin’ny fandaharanasa M300.
Namokatra karazam-bary an-tanety mifanaraka amin’ny toe-tany anivo ny Cirad sy ny Fofifa nandritra ny 30 taona. Nahafahana nandrakotra vary an-tanety sy namokatra 90% ny filàna anivon-tany izany. Manampy amin’ny fampiroboroboana ny fiompiana trondro an-tanimbary ihany koa ny vokatry ny fikarohana voly vary an-drano.