Natao teny Alarobia, omaly, ny fifanaovan-tsonia teo amin’ny minisitry ny Tanora sy ny fanatanjahantena sy ny mpitarika ny delegasionina avy any Kigali Rwanda, izay manaporofo fa horaisin’i Madagasikara ny hetsika “Youth Connekt Summit Africa”.
Raikitra ity! Nambaran’ny minisitry ny Tanora sy ny fanatanjahantena (MJS), Moustapha Marson Abdulah, omaly, tetsy Alarobia, fa handray ny fihaonamben’ny Tanora afrikanina, “Youth Connekt Summit Africa”, amin’ity taona 2025 ity, i Madagasikara. Hetsika lehibe izay hatao eto an-tanindrazana, ny 26 hatramin’ny 30 novambra ho avy izao.
Araka ny efa nambara ny alarobia teo, efa vita tanteraka, omaly, teny an-toerana, ny fifanaovan-tsonia manamarika fa horaisin’i Madagasikara amin’ ny fomba ofisialy ity hetsika ity. “Afrika mendrika antsika” no lohahevitra hobanjinina amin’ ity fivoriambe iray ity.
Nilaza ny mpitantana ny tanora sy ny fanatanjahantena malagasy fa hanana tombony betsaka amin’ity hetsika hatao eto Madagasikara ity ny tanora malagasy. Anisan’izany ny fampananana asa sy ny fampivelarana ny varotra ary indrindra ny fampitomboana ny fifandraisana any ivelany. Koa manentana ireo tanora ny Minisitra mba handray anjara mavitrika amin’ity fivoriamben’ny tanora ity. Tsara ny mampahafantatra fa firenena maherin’ny 40 eo no ho avy eto Madagasikara mandritra izany fotoana izany, ary raha tsy misy ny fiovana farany, ho tonga eto ihany koa ireo tanora any Eoropa sy ivelan’i Afrika.
Tsara ihany ny mampahatsiahy fa fotoan-dehibe ho an’i Madagasikara ny fampiantranoana ity Youth Connekt ity, eo ny fanamafisana ny fifanohanana amin’ny resaka politika. Hotanterahina eto mandritra io fihaonambe io moa ny fivorian’ ireo minisitry ny Tanora eto Afrika.
F.R
French