Mitoetra ho hetsika goavana indrindra isan-taona. Rehefa fetin’ny Paka, ao Antsirabe hatrany ny fanokafana ny « Star Tour ». Hotontosaina ny 18 hatramin’ny 21 avrily, araka izany, ny amin’ity taona ity, manoloana ny Gara hatrany. Niverina ho efatr’andro an-danonana toy ny taloha ny “Star Tour” Antsirabe, amin’ity, raha ny fanazavana nentin’ny mpikarakara, omaly, tetsy Andraharo.
“Lafiny telo no tena tandrovinay mafy rehefa Star Tour: ny filaminan’ny hetsika, ny kalitao ary ny fahatomombanan’ny fiaraha-mifalin’ny mpianakavy”, hoy i Miasy Andriamoria, mpikarakara. Hanokatra ny andiam-pampisehoana eo amin’ny sehatra lehibe i Samöela ny takarivan’ny zoma. Hotohizan’ny Reko Band sy Tence Mena izany, ny sabotsy. Hiaka-tsehatra ny alahady ry Tempo Gaigy sy Lico Kininike. Hamarana ny seho ny sabotsy kosa i Ckycky sy i Jaojoby. Hanentana ireo fotoana rehetra ireo i Eric sy Honorat, Bahrone ary Teg. Eo hatrany koa ireo mpikosika kapila nametraka dian-tanana tamin’ny “Star Tour”: Nicki Di Manu, Dj Looping, Dj Sniper ary Dj Three T. Tsy nisy niova kosa ireo fialamboly mahazatra hatramin’izay, ka anisany ny “Espace préssion” sy ny “kermess”.
Zo ny Aina
French