Antenimieran’ny Varotra : Manohana ny Base ny mpandraharaha any Toliara

Nihaona tamin’ny mpikambana ao anatin’ny Ante­ni­mieran’ny Varotra sy ny indostria (CCI) Toliara ny orinasa Base Toliara, tamin’ny fiandohan’ity herinandro ity. Naneho ny fahavononany hiara-kiasa akaiky amin’ny Base Toliara ny mpandraharaha any an-toerana. Noha­zavain’ny tomponandraikitry ny orinasa ny Drafitrasam-pampandrosoana entiny any amin’ireo kaominina voakasika.
Notsipihin’ny Talen’ny fi­fandraisana ivelany, Base Toliara, Mahafaritsy Samuel, fa “fitrandrahana harena am­banin’ny tany vaventy voalohany any Atsimo Andrefana ny Base, hitondra tombontsoa maro ho an’i Toliara. Hajaina ny lalàna, ny tontolo iainana ary ny vakoka ara-kolontsaina any an-toerana. Tsy afaka mandeha irery ny orinasa, fa tsy maintsy miara-miasa en­tina hampandrosoana ny faritra. Mpikambana ao anatin’ny filankevi-pitantanan’ny Ante­nimieran’ny harena an-kibon’ ny tany, ny Biraon’ny kadasitra ambanin’ny tany (BCMM) ary ny Anteni­mieran’ny Varotra ny Base Toliara ».
Nilaza ny filohan’ny CCI Atsimo-Andrefana, Vahinin­tsoa Alain, fa « tena nazava sady nahafa-po ny vaovao nifampizarana. Nam­pihetsika ny finiavana ho an’ny mpandraharaha miisa 35 ao anatin’ ny CCI Toliara ny fifanakalozan-kevitra, ary vonona ho eo anilan’ny Base ny rehetra hampiroboroboana ny toekarena aty Toliara. Marihina fa hany orinasa mihary amba­nin’ny tany mangataka fiaraha-miasa amin’ny CCI Atsimo Andrefana ny Base. Entanina ny hafa mba hanao toa azy ».

Njaka A.