INDRAY MIJERY

Nampihaona ny tanora sy ny orinasa teny amin’ny Kianja mitafo Ankorondrano, nandritra ny roa andro, ny “Tsenaben’ny asa sy ny fiofanana”, andiany faha-16. Hetsika ho fanampiana ireo tanora amin’ny fitadiavana asa sy ny fiofanana mbola eritreretiny hatao izany. Sehatrasa marobe no azon’ireo tanora mpitsidika nisafidianana. Misy koa ny fisokafan’ny orinasa mandray mpiasa eo an-toerana avy hatrany. Anjaran’ny minisiteran’ny Asa, ny fampananana asa ary ny asam-panjakana ny manome tantsoroka amin’ny fanofanana manampy amin’ny fitadiavana asa ho an’ny tanora. Tsiahivina fa nifarana omaly ny hetsika.
Hanohana ny governemanta malagasy ny Firenena mikambana amin’ny hanenana ny taham-pahafatesana amin’ny lozam-pifamoivoizana. Tonga nanatrika ny fanentanana ireo mpianatry ny Lycée Moderne Ampefiloha, tamin’ity herinandro ity. Mahakasika ny aro lozan’ny fifamoivoizana sy ny fisorohana ny voina an-tsekoly izany. Ny iraka manokan’ny Sekretera jeneralin’ny Firenena mikambana misahana ny « sécurité routière », Jean Todt, sy ny solontenan’ny Firenena mikambana miasa sy monina eto Madagasikara no niandraikitra izany.
Tonga nitsidika ny minisitry ny Fampianarana teknika sy ny fanofanana arakasa ny tompon’andraikitra avy ao amin’ny orinasa QIT Madagascar Minerals (QMM) taorian’ny fanaovan-tsonia fiaraha-miasa natao ny herinandro lasa teo, tao amin’ny QMM Taolagnaro. Nisongadina ny fifanakalozana momba ny fanatanterahana ny “alternance” mikendry ny hanamora ny fidiran’ny tanora eo amin’ny tontolon’ny asa, amin’ny alalan’ny fampifandraisana akaiky ny fiofanana sy ny asa eny amin’ny orinasa. Eo koa ny hamaritana ny fiaraha-miasa hoavy.