Nanome ny jery todika mahakasika ny tontolon’ny fizahantany, ny filohan’ny Filankevi-pitantanana ny (PCA) ny Ofisim-paritry ny Fizahantany Toliara (ORTU), Ranaivoson Odilon. Nambarany, fa « olana ny halaviran-toerana. Tsy misy intsony ny zotra ana habakabaka iraisam-pirenena aty Toliara, nanomboka ny 31 marsa 2024. Mihapotika ny lalam-pirenena RN7 ».
Miezaka mafy hanarenana ireo ny mpisehatra rehetra amin’ny fizahantany any an-toerana, hanomezana aina vao ity sehatra ity. Natomboka, volana vitsy lasa izao, ny tetikasa Big South Madagasikara, mahakasika faritra efatra any atsimo (Isalo-Ihorombe, Anôsy, Atsimo Andrefana, Menabe). « Atao ny ady sisika hamerenana ny zotra iraisam-pirenena. Eo am-pamolavolana ny tolotra vaovao, toy ny fitsidihana ireo farihy fito sy ny any Makay. Vinavinaina hisy mpizahatany 300 000 isan-taona ny any atsimo, raha mikendry 1 tapitrisa ny fanjakana amin’ny taona 2028 », hoy ihany izy.
Anisan’ny noresahan-dRanaivoson Odilon koa ny fisian’ ny tetikasa Base Toliara. Notsipihiny, fa « hisy tokoa ny asa hiforona. Fa mialoha izany, hisy ireo vahiny teknisiana hiasa ho an’ny orinasa ho avy sy hipetraka aty Toliara. Hampiroborobo ny fizahantany aty Atsimo Andrefana izy ireny ka hampitombo ny fifanakalozam-bola aty an-toerana ».
Aminy, « azo vinavinaina hampiasa vola hanitatra ny seranam-piaramanidina Toliara ny Base. Eo koa, ny fampiofanana ny tanora. Tsy atahorana ity tetikasa ity rehefa manaraka amin’ny antsipiriany ny bokin’andraikiny ».
Njaka A.
French