Vahaolana hanamorana ny fampiasam-bola aty amin’ny faritry ny ranomasimbe Indianina ny tetikasa « Valabe » na ny sehatra iombonana ho an’ny famokarana (espace commun agricole) apetraky ny Vaomieran’ny ranomasimbe Indianina (COI). Tetikasa hifanohanana sy hifanampian’ireo nosy manodidina ary ialana amin’ny fiankinandoha amin’ny fanafarana vokatra avy any ivelany. Vahaolana ara-toekarena ny tetikasa manoloana ny korontana ara-toekarena misy amin’ izao fotoana. « Antso ho an’ny firaisan-kinan’ireo nosy aty amin’ ny ranomasimbe Indianina ny tetikasa Valabe », hoy ny sekretera jeneralin’ny COI, Razafindravahy Edgard, nandritra ny lahateniny tamin’ny fanokafana ny fihaonamben’ ny filoham-panjakana sy governemanta, ny alakamisy teo, teny amin’ny CCI Ivato.
Ho an’i Madagasikara manokana, midadasika sy manana karazana toe-tany tsara ho an’ny famokarana sy vokatra mampiavaka ny faritra tsirairay isika. Tombondahany ny hanohanana ireo 80% ny tantsaha hanatsarana sy hampiroboboana ny vokatra ho an’ny fampandrosoana ny toekarena. Heverina fa vahaolana lehibe ny hanatanterahana ny tetikasa. Ilaina, araka izany, ny hanentanana sy hanofanana ireo mpamokatra hamaliana ny filana aty amin’ny ranomasimbe Indianina sy ny kalitaom-bokatra takina ary ny fenitra apetraka eo anivon’ny tsena.
Tombontsoa
Takina ao anatin’ny tetikasa ny hametrahana firaisan-kina sy ny tombontsoa iraisan’ ny nosy rehetra hahatrarana ny fahaleovan-tena sy ny fahavitan-tena ara-tsakafo. «… Fanoitra ho an’ny fampandrosoana ny fahavitan-tena. Fotoana izao hamokarana sy hanandratana avo ny otrikarena sy ny fahaiza-manaontsika. Ilaina ny firaisan-kina sy ny fifanohanan’ireo firenena mpikambana eo anivon’ny COI ho an’ny fampandrosoana lovainjafy », hoy kosa ny filoham-pirenena, Rajoelina Andry. Nanohana sy resy lahatra tamin’ny fanambaran’ ny filoha malagasy ireo filoham-pirenena sy delegasiona avy amin’ireo nosy rahavavy hahatrarana ny fahaleovan-tena ara-tsakafo.
Maro samihafa ny tombontsoa iombonana ao anatin’ny tetikasa valabe. Tombony lehibe eo amin’ny sehatry ny toekarena sy ny fampandrosoan’ny firenena tsirairay ny tetikasa. Ahafahan’ireo vokatra aty amin’ny faritry ny ranomasimbe Indianina mifaninana eo amin’ny tsena iraisam-pirenena sy manamafy orina ny fifaneraserana eo amin’ny nosy manodidina ary manatsara ny fifanakalozana eo amin’ireo firenena mpikambana.
Miara-mientana
Efa mifampiresaka ankehitriny ireo firenena mpikambana eo anivon’ny COI hanatanterahana ny tetikasa valabe. « Misy ny antanan-tohatra samihafa mandinika manokana ny lafiny ara-teknika ny tetikasa. Aorian’io, miakatra eo anivon’ ny filankevitry ny minisitry ny COI ary miakatra eo anivon’ny fihaonambe raha ilaina izany », hoy ny minisitry ny Rahara-ham-bahiny, Rasata Rafaravavitafika, omaly.
Vahaolana ara-stratezika ny tetikasa “valabe”. « Manatsara ny fandraharahana sy ny fifanakalozana ara-barotra aty amin’ny ranomasimbe Indianina », hoy ny filohan’ny sendikan’ny indostria eto Madagasikara (SIM), Rasamimanana Tiana. Manantena ny indostria eto Madagasikara fa hiara-hiasa amin’ny fitondram-panjakana hanatanterahana ny tetikasa. Notsindrian’ny filohan’ny SIM manokana fa isan’ ireo fehin-kevitra voalaza tao anatin’ny fihanamben’ny CEO Summit andiany voalohany nivondronan’ireo avy amin’ny sehatra tsy miankina, ny mpitantana orinasa, mpampiasa vola ary mpandraharaha manerana ny faritry ny ranomasimbe Indianina ireo mandrafitra ny fandaharanasa apetraky ny COI. Tafiditra ao anatin’izany ny fametrahana ny « label indian ocean » hampiroboroboana ny vokatry ny indostria aty amin’ny faritra. Ny fanatsarana ny fifanakalozana amin’ny alalan’ny fametrahana fenitra ara-kalitao ary ny fahavitan-tena ara-tsakafo. Zava-dehibe, araka izany, ny hanohizana sy hampaharitra ireo vina hanatanterahana ireo ezaka ho an’ny fampandrosoana ny toekarena sy ny fahavononan’ny tsirairay avy.
Henintsoa
French