Tsy afa-misaraka eo amin’ny tontolon’ny asa ny nomerika sy ny haitao ara-kajy mirindra hampandrosoana ny fandraharahana sy ny fitantanana. Maro ny tombontsoa entiny, misy koa ireo voka-dratsin’ny fikirakirana ny teknolojia.
Hampahafantatra ireo tombontsoa sy ny fiantraikan’ny fampiasana ny teknolojia eo amin’ny sehatry ny fandraharahana sy ny fitantanana ny Dr Fabrice Lollia, matihanina eo amin’ny teknolijia sy ny fandraharahana. Manampy azy ny Dr Lou Maurica, tompon’andraikitry ny oniversite Haute Ecole en Informatique (HEI). Eo koa Andriamahery Ryan, tale an’ny fitantanana eo anivon’ny HEI. Ho voaboahasin’ireo matihanina ireo eny amin’ny Hôtel 5 étoiles Ivato, ny 10 mey, ireo fomba fanao tsara ny nomerika hampahomby ny fitantanana sy ny fandraharahana. « Miavaka ny lohahevitra mandritra ny fihaonana faharoan’ny mpandraharaha noho izy hiompana tanteraka amin’ny fampiasana ny teknolojia eo amin’ny sehatry ny fitantanana », hoy ny Dr Fabrice Lollia. Horesahina manokana ireo fomba hisorohana ny loza mety hiseho, ny lafiny tsara sy ratsy ny fampiasana ny teknolojia amin’ny fitantanana olona sy orinasa.
Fampandrosoana
Mandray anjara betsaka amin’ny fampiroboroboana ny toekarena ny fandraharahana. Ilaina ny fananana paikady hampahomby ny fitantanana sy ho fampandrosoana ny fihariana. Tafiditra ao anatin’izany ny fifantohana sy ny fahavononana hiatrehana ireo fanamby samihafa sy ny vina apetraka. Mila omen-danja ny tsirairay ao anatin’ny tontolon’ny fandraharahana hahafahana mandroso sy miatrika ny manodidina hahazoam-bokatra. Takina ny fahaiza-miaraka amin’ny ekipa, ny faharetana, ny fikirizana ary ny fifanajana. “Mpisehatra manodidina ny 30 eo no andrasana ho avy amin’ity hetsika karakarain’ny Peak business Partner, Focus, Nexacom ary HEI ity. Tafiditra ao anatin’izany ny mpitantana orinasa, mpandraharaha, tompon’andraikitry ny fitantanana ny olona sns”, hoy Randrianantenaina Hasina, tale jeneralin’ny Peak Business. Manohana tanteraka ny hetsika ny Yas. Anisan’ny vokatra arosony tsy ho ela ny “Yas business” hanohanana ireo mpandraharaha, hoy ny tomponandraikitry ny tetikasa, Raharimanjato Eli Malala.
Henintsoa
French