Naiditra am-ponja, omaly, ireo telo lahy namono nahafaty raim-pianakaviana teny Ambohinambo Talatamaty. Atidoha nikotrika izany ny zanany lahy. Antony, valifaty sy tahotra ny tsy handova.
Niakatra fampanoavana, omaly, ny tovolahy telo. Monina eny Ambohinambo Talatamaty izy ireo. Voarohirohy ho namono nahafaty ny raim-pianakaviana teny an-toerana ny faha-3 avrily 2025 lasa teo. Zanaky ny lasibatra ny iray amin’izy ireo, atidoha nikotrika ny vono olona. Valifaty an-drainy noho ny nisarahany tamin’ny reniny efa valo taona lasa, niampy tahotra ny tsy handova no antony namonoan’izy ireo azy. Manamafy izany ny fiaikeny heloka nandritra ny famotorana sy ny fakana am-bavany azy ireo.
Marihina fa nanambady vehivavy hafa ity raim-pianakaviana novonoina ity. Nifampiteraka rahateo izy roa. Niteraka lonilony anaty sy fankahalana tamin’ilay tovolahy vao 17 taona izany. Nohararaotiny ny fiarahana tamin-drainy, hanaovana andrana fiara mba hahafahany mandatsaka ny ainy. « Nanao andrana fiara marika Kia Sportage niaraka tamin’ilay rainy io lehilahy io sy ireo roa lahy, ny harivan’ny 3 avrily tamin’ny 5 ora sy sasany », araka ny angom-baovao azon’ny mpanao famotorana.
Nanara-panjaitra
Teny an-dalana hody, avy nanao andrana ilay fiara teny Andakana, kaominina Anosiala, no niseho ny vono olona. Noleran’ireo tovolahy roa, niara-dalana tamin’izy mianaka antsy ity raim-pianakaviana ity. Voalaza fa mbola afaka nanohitra izy, ary niezaka nanavo-tena ka nahavaky ny fitaratry ny fiara. Tapitra teny an-dalana anefa ny ainy ka narian-dry zalahy teny amin’ ny tany malalaka eny Ambohinambo ihany. Ny ampitso vao nisy nahita ny razana.
Nanaraka baiko, nilaza ho kofehy manara-panjaitra izy roa lahy. Izay efa nitsoaka taorian’ny vono olona. Ilay mpaniraka ihany anefa avy eo no nanondro azy ireo, nahafahana nisambotra. Niaiky ny helony izy telo lahy, naiditra am-ponja vonjimaika omaly.
Tsiferana R.
French