Hotanterahina anio, ao amin’ny lasapelina Sixtine, ny “Conclave”, fifidianana ny handimby ny papa François eo amin’ny fitantanana ny fiangonana katolika Romanina. Hitodika any Vatican ny mason’izao tontolo izao. Voafidy avy hatrany ny papa ny dikany rehefa miakatra ny setroka fotsy avy ao amin’ny Sixtine. Hisahana andraikitra lehibe hanonona ny anaran’ny ho papa ny kardinaly Mamberti ary hanonona ny fehezan-teny hoe “Habemus Papam” eo amin’ny lavarangan’ny Bazilikan’i Md Piera. Tsy mbola voafidy kosa anefa izay handimby ny papa François izay raha mbola mainty ny setroka mivoaka.
Amin’ny ankapobeny, tsy nihoatra ny efatra andro ny “Conclave” nataon’ireo kardinaly tamin’ny fifidianana ny papa hatramin’ny taonjato faha-20 no ho mankaty. Na izany aza, tombanana ho roa hatramin’ny efatra andro ny “Conclave” amin’ity indray mandeha ity raha 48 ora ihany izany tamin’ny nifidianana ny papa François ary nihodina indimy ny fifidianana. “Manantena isika fa efa hahazo papa vaovao mialoha ny alahady
11 mey izao”, hoy ny mpanao gazety sady manampahaizana manokana ao Vatican, i Bernard Lecomte.
Ankoatra izany, miisa 18 ireo kardinaly afrikanina hiatrika ny “Conclave” ka anisan’ izany ny kardinaly Tsarahazana Desiré. Miisa 133 kosa ireo kardinaly rehetra.
Tsiahivina fa efa nohavaozina avokoa ireo fitaovana sy ny efitrano Sixtine hanatanterahana ny fifidianana. Efa nametraka tahaka ny mahazatra ny fantsona hitondra sy hamoaka ny setroka ireo mpamonjy voina ao Vatican.
Synèse R.
French