Nisy nibata tao am-pandriana, tao an-tranony, tetsy Avaratra Antanimora ny ankizivavy vao enin-taona monja, afakomaly alina. Hita tany anaty ala teny amin’ny manodidina izy io, omaly maraina. Fantatra taorian’ny fizahana nataon’ny mpitsabo fa voaolana izy.
Tsiahivina, nandeha nitsena ny reniny izay mbola taraiky niasa alina tany ivelan’ny trano ny olon-dehibe roa tao an-trano, afakomaly tamin’ny 9 ora alina. Nijanona niandry trano sy niaraka tamin’ilay ankizy kosa ny olon-dehibe iray hafa. Resitory ity farany nandritra izany. Nisy niditra antsokosoko tao an-trano ary nibata azy. Gaga sy taitra ny reniny sy ireo olona nitsena azy rehefa tafaverina fa tsy hita tao an-trano ilay zaza. Natao avy hatrany ny fikarohana.
Vokany, omaly maraina, hita ity ankizivavy ity. Hita tany anaty ala iray teny amin’
ny manodidina izy io. Tsy tonga saina, nisy ratra ny masony ary nahitana tasy ra ny pataloa izay nanaovany, raha ny fitantaran’ny fianakaviana nanontaniana. Nentina teny anivon’ny hopitaly Joseph Raseta Befelatanana (CHU JRB) ny zaza taorian’izay. Fantatra nandritra izany, fa nisy nanolana izy, araka ny valin’ny fizahana nataon’ny mpitsabo.
Efa nametraka fitoriana eny anivon’ny kaomisaria foibe Tsaralalàna ny fianakaviana, raha ny fanazavana voaray hatrany. Hatramin’ny omaly, tsy mbola fantatra ny olona nitondra sy nibata io ankizivavy io.
Mino
French