Handray anjara amin’ilay fifaninanana irasaim-pirenena IA4GOOD Festival i Madagasikara. Fifaninanana ampiasana ny faharanitan-tsaina artifisialy (IA) natokana ho an’ny tanora 12 ka hatramin’ny 25 taona. Hifantoka amin’ny famoronana horonan-tsary fohy 1-2 minitra amin’ny alalan’ny fampiasana ny IA ny lalao. Hivoitra ao anatin’izany ny tetikasam-panabeazana, ny ankizy sy ny tanora ao anatin’ny tontolon’ny teknolojia. Lohahevitra amin’ity taona ity ny «Good Tech, Bad Tech» ary ny «Superhero Everyday». «Ho jerena ny famoronan’ireo tanora, ny dingana sy ny fepetra narahiny. Mila asongadina ihany koa ny maha Malagasy», hoy ny talen’ny Okalou, sady mpikarakara ny hetsika, Rasoanarivo Andy, omaly. Hotanterahina ny sabotsy 24 mey, eny amin’ny Canal Olympia Andohatapenaka, ny fanolorana ny loka ho an’ireo mendrika indrindra. Izy ireo indray no hisolo tena an’i Madagasikara mandritra ny fifaninanana iraisam-pirenena ny 31 mey. «Manana ny hoaviny ny fampiasana IA ka hitondra lavitra ny tanora», hoy ny tale jeneralin’ny Riano Agency, Nathalie Nirinarivelo. Notohizany fa manampy amin’ny fampandrosoana ny fanabezana ny IA rehefa ampiasaina amin’ny tokony ho izy. Manohana izao hetsika izao ny tambajotram-pifandraisana Yas Madagascar, izy izay mametraka ny fampiasana ny teknolojia ho ivon’ny asa iandraiketany.
Henintsoa
French