Hatao ny 31 mey sy ny 1 jona ho avy izao ny “Aéro-Expo 2025” eny amin’ny tobin’ny Tafika ana habakabaka sampana helikopitera Ivato. Hetsika karakarain’ny Tafika ana habakabaka, ka mpiara-miombon’antoka manohana azy ny orinasa Yas Madagasikara.
Tanjona ny hampahafantarana ny tontolon’ny sidina ana habakabaka. Ao anatin’izany ny asa sy ny fahaiza-manaon’ny Tafika Malagasy, izay anisan’ny tompon’andraikitra amin’ity sehatra ity. Ho hita mandritra ireo roa andro ireo ny tontolon’ny fitaterana sy ny manodidina ny sidina ana habakabaka rehetra. Hampahafantarana ihany koa ny fampandrosoana entiny. Tanjona ny hanakaikezana bebe kokoa ny mpiray tanindrazana, satria eny akaiky eny ny seranam-piaramanidina iraisam-pirenena Ivato Antananarivo.
Toekarena sy fizahantany
Manana ny lanjany sy ny toerany amin’ny lafiny toekarena sy ny fizahantany eto an-toerana ny sehatry ny sidina ana habakabaka. Maro ny mpiray ombon’antoka samihafa handray anjara. Singanina amin’izany ny Fikambanana iraisam-pirenena misahana ny mponina sy ny sosialy (UNFPA), misahana ny sosialy, ny fitsaboana, sns.
Ankoatra ny daholobe, kendrena manokana koa ny tanora sy ny olona liana na mankafia ny tontolon’ny
sidina ana habakabaka. Hisy ny fanamafisana ny fiaraha-miasa eo amin’ny sehatra iraisam-pirenena. Maro ny hetsika ho hita eny an-toerana, ny fampirantiana, ny fanentanana, ny kilalao samihafa.
Njaka A.
French