Voasambotry ny zandarimaria notarihin’ny Kly Faneva, tao amin’ny kaominina Antanimeva, faritra Atsimo Andrefana, omaly, ny lehilahy atao hoe Veve, izay nisoloky sady nivadi-pitokisana. Roa taona nifampitadiavana io lehilahy io. Namoahan’ny mpitandro filaminana filazana fikarohana tao Maintirano izy nanomboka ny taona 2023. Zaodahin’ny mpanao baolina malaza iray eto an-toerana “Voavy Paulin” io lehilahy io. Nametraka fitokisana tamin’ io zaodahiny io ilay mpilalaon’ny ekipam-pirenena teo aloha. Tsy araka ny nandrasany ny zava-nisy. Nivadi-pitokisana, nangalatra ny vola sy entana io zaodahiny io. Niala tao amin’ny kaominina Maintirano anefa i Veve. Nifindrafindra toeram-ponenana izy nanomboka tamin’ny fotoana nitadiavan’ny mpitandro filaminana azy. Nanova anarana rahateo ny lehilahy. Nosoloiny ho Alibay ny anarany izay fantatra tamin’ny hoe Exavier Bersene. Tetsy ankilany, namoaka tamin’ny alalan’ny tambajotran-tserasera ilay mpilalao baolina kitra lasibatra fa hanome lelavola 10 tapitrisa Ar ho an’ireo mahita sy mahasambotra an’i Veve. Nandray ny andrikiny rehefa nahazo loharanom-baovao ny ekipa notarihin’ny Kly Faneva tao Atsimo Andrefana. Tratra tao Antanimeva io mpisoloky sady nivadi-pitokisana io. Atolotra ny fampanaovana tsy ho ela aorian’ny fanadihadiana izy.
Tsiferana R.
French