Raha somary natoritory ny taranja beach soccer, hofohazina amin’ny alalan’ny “Festival Mazavaloha” indray. Hitovy amin’ny fifaninanam-pirenena mihitsy satria hitiliana ireo izay handrafitra ny Barea de Madagascar. Hiara-dalana amin’izany ny fiofanana ho an’ny mpanazatra.
Hotanterahina any Mahajanga, ny 3 hatramin’ny 9 jona ho avy izao, ny “Festival Mazavaloha”, taranja beach soccer na baolina kitra lalaovina ambony fasika, izay karakarain’ny Yas Madagascar sy ny Federasionina malagasin’ny baolina kitra (FMF). Nisy ny valandresaka natao tamin’ny mpanao gazety omaly, tetsy Andraharo, niresahina manokana mahakasika izany.
Nilaza i Theophan Pontiac, tomponandraikitra voalohan’ny beach soccer eo anivon’ny federasionina, fa atao ity fifaninanana ity hahafahana mitily ireo mpilalao handrafitra ny ekipam-pirenena hiatrika ny fiadiana ny ho tompondakan’i Afrika (Can) sy ny Cosafa Cup.
Hiofana ny mpanazatra
Ankoatra izay, hampiavaka ny hetsika ny fahatongavan’ilay frantsay mpanazatra Barea fahiny, i Claude Barrabé. Raha ny fanazavana nomen’ny tale teknika nasionalin’ny FMF, ity teknisianina frantsay ity no hitondra ny anjara birikiny amin’ny fampiofanana ny mpanazatra. Faritra 12 eo no andrasana hisoratra anarana amin’ity fifaninanam-pirenena ity. Hatreto, efa miisa fito ireo nilaza fa handray anjara amin’izany. Ankoatra ny faritra Boeny, mpampiantrano, ho avy koa Vatovavy, Atsimo Atsinanana, Melaky, Atsinanana ary Anosy. Hozaraina ao anaty vondrona telo ireo faritra 12 mandray anjara, ka tafita amin’ny ampahefa-dalana ny valo mendrika indrindra.
“Somary nangina ny resaka beach soccer teo aloha. Ny faran’ny taona ho avy izao, hikarakara fifaninanana nasionaly amin’ity taranja ity ny federasionina”, hoy i Theophan Pontiac, filohan’ny beach soccer eo anivon’ny FMF.
Fitia Randria
French