Raim-pianakaviana iray sy ny zanany roa lahy namoy ny ainy tao amin’ny kaominina Antsatramidola, omaly. Rahalahiny no nahavanon-doza.
Zazalahy 4 taona, 6 taona ary ny rainy niara-maty voakapakapan’ny antsy tao Mahambolona, kaominina Antsatramidola, distrikan’i Mandritsara, omaly maraina. Nifamaly tamin’ny rainy ny lehilahy iray noho ny resaka lova, araka ny loharanom-baovao. Norahonan’io lehilahy io ny rainy, afakomaly. Nametraka fitoriana teny anivon’ny mpitandro filaminana ilay raim-pianakaviana. Nikasa handamina ny savorovoro misy eo amin’ny fianakaviana ny zokin’ilay lehilahy nandrahona ny rainy io. Tsy nanampo na inona na inona ilay zokiny. Nivoaka naka antsibe ilay zandriny. Norasarasainy antsy ny rahalahiny 52 taona. “Nokapain’io lehilahy io antsy avy hatrany ilay zokiny”, hoy ny vavolombelona nanatri-maso ny zava-misy tao an-toerana. Nisaraka tanteraka ny lamosiny.
Zaza nilalao
Lasibatry ny habibiana nataon’ny rahalahin-drainy koa ireo zaza roa nilalao teo an-tokotany. Voarasa antsy ny lamosina, ny lohan’iray raha toa ka tapaka ny tendan’ny iray voakapa tao amin’ny hatony. Vokany, namoy aina avokoa ireo telo mianaka. Tafatsoaka ilay rain’ny nahavanon-doza izay mbola nokasainy hovonoina. Noraisin’ny mpitandro filaminana an-tanana ny fiarovana ny ainy. Karohina io lehilahy namono ny rahalahiny sy zana-drahalahiny io. Mikaroka azy rahateo ny fokonolona. Lonilony nateraky ny ady lova no heverina ho nahatonga ny loza, araka ny fanampim-panazavana. Anatin’ny famotorana tanteraka ny polisy miasa ao Mandritsara. Andrasana ny tohin’ny raharaha.
Tsiferana R.
French