Miandry ny tohiny ny rehetra! Na roa andro monja aza, nahafantaran’ny mpitsidika ny momba ny Tafika ana habakabaka sy ireo mpiara-miombon’antoka aminy ny “Aero Expo 2025”…
Nifarana omaly ny hetsika fampirantiana “Aero Expo 2025” teny amin’ ny tobim-pamaharan’ny Tafika ana habakabaka Base 213 – Escadron hélicoptère Ivato. Fampirantiana ivondronan’ ireo mpisehatra maro amin’ny tontolon’ny habakabaka izay nokarakarain’ny Tafika ana habakabaka Malagasy niarahana tamin’ireo mpiara-miasa sy mpiara-miombon’antoka ara-panjakana sy ny sehatra tsy miankina aminy. Nanokatra izany tamin’ny fomba ofisialy ny minisitry ny Foloalindahy (MFA), ny Jly Sahivelo Lala Monja Delphin, izay nidera manokana ny fahasahiana entin’ireto vondron-tafika ireto nikarakara ny hetsika. « Mitory ny fahavonan’ny rehetra hampivelatra ny sehatry ny fitaterana ana habakabaka ny fahatontosana izao hetsika izao, iarahan’ny mpisehatra rehetra », hoy ny MFA. Nentina nanamarika ny fanokafana izany tao amin’ny tobim-pamaharan’ny Tafika ana habakabaka ny filatsahana anelonaina nataon’ireo miaramila Commando. Naneho fisaorana an’ireo mpiara-miombon’antoka tamin’ny fanohanan’izy ireo ny lehiben’ny Etamazaoron’ny Tafika ana habakabaka. Marihina fa naharitra roa andro ny fampirantiana, nahitana tranoheva 19, izay misehatra amin’ny tontolon’ny fitaterana ana habakabaka. Nahitana lalao samihafa ihany koa teny an-toerana, nahafahan’ny mpianakavy nandray anjara. Niavaka ny fisian’ny antsapaka nahazoana sidina maimaimpoana amin’ny fiaramanidin’ny Tafika ana habakabaka sy ny filatsahana anelonaina olon-droa miaraka.
Jean Claude
French