Hosokafana amin’ny fomba ofisialy, anio, ny hetsika fankalazana ny faha-65 taona niverenan’ny Fahaleovantena sy ny nijoroan’ny Foloalindahy Malagasy. Homarihina amin’ny hetsika maro izany manomboka izao.
Hisantarana izany ny fananganan-tsaina azon’ny rehetra atrehina etsy amin’ny Lapan’ny tanàna Analakely, ho an’ny eto Antananarivo Renivohitra. Hitarika ny lanonana amin’izany ny filohan’ny Repoblika, Rajoelina Andry. Hisy ny fanentanana samihafa ny amin’ny tokony hananganan’ny rehetra ny sainam-pirenena, manomboka amin’io 2 jona io ary haharitra iray volana izany. Hifarana ny 2 jolay ho avy izao.
Hanamarika izany fankalazana ny fetim-pirenena izany koa ny fitokanana ny tsangambaton’ny faha-65 taona niverenan’ny Fahaleovantena sy nijoroan’ny Foloalindahy. Anisan’ny hankalazana izany ny “Carnaval” lehibe, handraisan’ny faritra 24 anjara. Eo koa ny matso lehibe fanao isan-taona ka hampiavaka izany ny fanamiana vaovao ho an’ny eo anivon’ny Foloalindahy.
Afomanga, “Poduim”, kerimesy…
Manampy izany ny afomanga eny amin’ny Lac Iarivo, Tsarasaotra, sy ny seho an-tsehatra “Podium”. Eo koa ny hetsika ara-panatanjahantena, ny kerimesy sy ny diaben’ny Hery fiarovana sy filaminana. Samy hanamarika izany amin’ny alalan’ny hetsika ara-kolontsaina koa ny eny anivon’ny faritra.
Ankoatra izany, hisy ny fotoam-pivavahana eny amin’ny advantisa sy ny eo anivon’ny finoana silamo ary koa ny avy amin’ny FFKM.
Araka izany, miantso ny vahoaka malagasy hanatrika sy haneho firaisankina amin’ny alalan’ny fanehoam-pitiavan-tanindrazana ny komity mpikarakara ny hetsika fankalazana ny fety niverenan’ny Fahaleovantena.
Synèse R.
French