Ho fanamarihana ny 31 mey, andro natokana tsy hifohana sigara maneran-tany, nanao hetsika fanentananana, ny faran’ny herinandro teo, teny Analakely, ny Sampana fanantenana eo anivon’ny fiangonana FPVM manana tarigetra miady amin’ny zava-mahadomelina.
300 ny mpikambana ao amin’ny sampana, ahitana ankizy manomboka eo amin’ny 5 taona hatramin’ny olon-dehibe. Fitaizana ny tanora sy ny ankizy dieny mbola kely hifady zava-mahadomelina ny andraikitry ny sampana. Miaraka amin’ny fanabeazana ara-tsaina, ara-panahy ary ara-batana ao anatin’ny fikambanana ny fitaizana. Ankoatra ny fanentanana, ny faran’ny herinandro teo, misy hetsika indroa isan-taona hanaovana zavatra amin’ ny tanàn-dehibe ankoatra ny eto Antananarivo, hanentanana ny olona amin’ny tokony hialana amin’ny zava-mahadomelina amin’ny ankapobeny. “Isaky ny volana aogositra kosa ny any amin’ny faritany ny hetsika lehibe ao anatin’ny tafika masina ampiarahana amin’ny fanentanana momba ny ady amin’ny zava-mahadomelina”, hoy ny mpikambana iray amin’ny biraon’ny sampana fanantenana, Miora Hanitriniala.
Andiany faharoa ny zavatra naseho teny Analakely, azo tsapaina ny vokatra satria betsaka ny olona te hiala amin’ ny sigara sy zava-mahadomelina manatona. Vahaolana voalohany atolotry ny sampana ny fitaizana ara-panahy, ahafahany miala amin’ny zava-mahadomelina. Tena betsaka ny olona miditra amin’io sehatra io sady mora ny fidirana aminy raha sarotra kosa ny miala aminy ary vitsy no afaka tanteraka.
Araka ny antontanisa nambaran’ny OMS, 10 tapitrisa isan-taona ireo olona maty vokatry ny fifohana sigara, maneran-tany, ary antony mahatonga ny taham-pahafatesana be indrindra ny sigara.
Tamin’ny alalan’ny “mime” mifono fanentanana no nitondran’ny tanora hafatra momba ny faharatsian’izany. Toy ny fanao mahazatra, mifampizara manerana an’Antananarivo ny mpikambana ka nanaparitaka “autocollant” hatrany Ambohimangakely hanentanana momba ny ady amin’ny sigara sy ny zava-mahadomelina.
Vonjy
French