Mitohy ny fametrahana ny Birao solontenan’ny fananan-tany iraisana « BSFI » eny ifotony. Ezahin’ny eo anivon’ny minisiteran’ny Fitsinjaram-pahefana (MFFT) hapetraka amin’ireo distrika manerana ny Nosy izany.
Anisan’ny nisitraka izany ny ao amin’ny kaominina Ankadinondry Sakay, faritra Bongolava. Natao hisahana ny kaominina Tsinjoarivo, Ambararatabe, Mahasolo, Maritampona, Maroharona koa ny BSFI ao an-toerana.
“Natao hanamorana ny fangatahana ny taratasin-tany sy ho ivontoerana mampahafantatra ny toromarika rehetra momba ny fananan-tany, hisorohana ny ady tany ny birao”, hoy ny tomponandraikitra tamin’ny fametrahana ny BSFI, ny herinandro teo. Nambaran’ izy ireo fa fanavaozana mametraka fitantanana mandray andraikitra sy manakaiky vahoaka no atao. Tsy vitan’izany koa fa mifanaraka amin’ny laharam-pahamehana ho an’ ny fampandrosoana ny faritra eto Madagasikara izao ezaka izao.
Fizarana karatany
Ankoatra izay, nisy koa ny fizarana karatany miisa 1 200 ho an’ireo mponina. Vokatry ny fiaraha-miasa tamin’ny tetikasa Casef sy noho ny finiavana manokana nataon’ny kaominina izany. Teo koa ny fanolorana fitaovana ho an’ny birao Cirdoma sy Cirtopo tao amin’ny kaominina Arivonimamo, niarahana tamin’ny Tahirimbola nasionaly ho an’ny fananan-tany “Fond national foncier -FNF”. Nitarika ny fametrahana ny BSFI tany an-toerana ny tale jeneralin’ny fananantany sy fandrefesan-tany eo anivon’ny MFFT. Natrehin’ireo manampahefana maro isan-tsokajiny.
Synèse R.
French