Barea de Madagascar hifandona amin’i Angola. Afrika Atsimo hifampitana amin’i Comores. Ireo ny fandaharan-dalaon’ny manasa-dalana amin’ny fiadiana ny ho tompondaka amin’ny “Cosafa Cup 2025”. Fihaonana hotanterahina rahampitso, ao amin’ny Kianja Toyota stadium, Afrika Atsimo.
Manohy ny diany any amin’ny dingana manasa-dalana ny Barea de Madagascar (A’), eo amin’ ny fiadiana ny ho tompondakan’ireo firenena aty amin’ny tapany atsimon’i Afrika (Cosafa cup 2025). Ny fandresen’i Tanzanie an’i Eswatini no nahazoan’ny Malagasy ny tapakila. Omaly, tao amin’ny Kianja Toyota Stadium Afrika Atsimo, lavon’i Tanzanie tamin’ny isa 2 no ho 1 i Eswatini, ho an’ny sokajy “C”. Vokatra, mametraka ny Barea de Madagascar eo amin’ny lohany.
Raha tsiahivina, manana isa 4 ny Barea, rehefa nandresy an’i Tanzanie tamin’ny isa 1 no ho 0 ny zoma 6 jona, sy nisaraka ady sahala 1 sy 1 tamin’i Eswatini, ny alatsinainy 9 jona teo. Faharoa, ry zareo Tanzanianina manana isa 3, resy indray mandeha ary nandresy indray mandeha. Fahatelo farany i Eswatini, isa 1 monja.
Araka izany, hiatrika ny ankatoky ny famaranana izany ny Barea de Madagascar rahampitso zoma ka hifanandrina amin’i Angola, tafavoaka tao amin’ny sokajy “B”. Fihaonana hotanterahina ao amin’ ny Kianja Toyota Stadium.
Raha hiverenana ny fihaonana teo amin’i Eswatini sy i Tanzanie, omaly, nanokatra ny isa voalohany i Eswatini, tamin’ny alalan’i Andy Junior Magagula, teo amin’ny minitra faha-29. Nosahalain-dry zareo Tanzanianina izany, rehefa namono baolina tany amin’ny minitra faha-37 i Iddy Nado. Io isa 1 sy 1 io no nentin’ny roa tonta niala sasatra. Fidirana faharoa, nifandimbiasana ny fanafihana. Nanampy ny baolina ho azy indray i Shekhani Ibrahim Khamis, teo amin’ny minitra faha-70. Teo dia efa nazava ny lalan’ny Barea de Madagascar. Ho an’ny manasa-dalana ilany, hifandona amin’i Comores ry zareo Afrikanina Tatsimo mpampiantrano.
Tompondaka
French