Atrehina ny fiavian’ny haintany any Atsimo. Mila miomana ny tomponandraikitra rehetra amin’ny fanalefahana ny fiantraikan’izany amin’ny mponina.
Nanatanteraka fiofanana ho an’ny tomponandraiki-panjakana any amin’ny faritra Androy sy Anosy, ny herinandro teo, ny BNGRC, ho fiomanana amin’ ny fiatrehana ny loza sy ny haintany. Antony nanaovana izany ny ho fahalavorarian’ny fiatrehana sahady amin’ny fihavian’ny haintany. Ho fampiharana ihany koa ny drafitra fiomanana, izay natao ny volana septambra 2024 sy ny paikady amin’ny resaka fifandraisana, natao ny volana mey 2025.
Tanjona ny hanombanana ny fahafahan’ireo kaomity hitantana ny loza sy ny tandindon-doza eny ifotony amin’ny fandaminana sy ny hamaliana araka ny tokony ho izy ny haavon’ny fanairana.
Navoitra nandritra ny fiofanana ny fahafahana, ny fanamafisana ary ny fiaraha-miasa sy ny fandrindrana eo amin’ny rafi-panjakana sy ireo mpisehatra amin’ny maha olona. Nohamarinina ny kalitao, ny maha zava-dehibe ny fifandraisan’ny andrim-panjakana isaky ny dingana amin’ ny krizy.
Voasedra avy amin’ny toe-javatra tena iainana ny fomba fiasa hita ao amin’ny drafitra. Voafaritra mazava ny anjara asa sy ny andraikitry ny sehatra marolafy amin’ny haintany. Nifarimbona tamin’ny fiofanana ireo sampandraharaham-panjakana ao amin’ny faritra Anosy sy Androy, ireo solontena avy amin’ny Pam, Unicef ary ONG, nahitana ny WHH, Sahi, ACF, Croix Rouge.
Tsy afa-bela amin’ny haintany ny faritra atsimon’ny Nosy. Lasibatra ny mponina, tsy afaka mamboly, mijaly ny biby fiompy. Lasa mitsoa-ponenana mihitsy ny sasany, miala amin’ny haintany.
Ho fiatrehana izany ny anton’ny fitadiavana vahaolana iombonana eo amin’ireo tomponandraikitra mahefa.
Tatiana A
French