Hatao ny sabotsy 21 jona izao, eny Ambohijanaka, ny andiany voalohany amin’ny “Festival de Trails Madagascar”, karakarain’ny fikambanana Kolovatana. Natao ity hetsika ity mba hampivondronana sy hanentanana ny tanora sy ho fampiroboroboana ny fizahantany. Manana tombony ny tanànan’Ambohijanaka, 11 km miala an’Antananarivo, ho an’ny karazana hazakazaka an-tendrombohitra. “Tanjona ny hampiroborobo ny fandraisan’ny tanora anjara amin’ny fanatanjahantena, manabe sy mampiseho ny fahaiza-miatrika ady sy ny fahaiza-manatsara tena”, hoy ny filoha mpanorina ny Kolovatana, Andriamamonjy Mihasintsoa. Hisongadina ny hazakazaka: 3 km ho an’ny ankizy, 7 km ho an’ ny olon-dehibe, na mandeha tokana na tsiroaroa, lahy sy vavy, na amin’ny ekipa, ary 21 km ho an’ny matihanina. Eo amin’ny bisikileta kosa, 5 km ho an’ny ankizy, 21 km cross-country ho an’ny matihanina sy ireo mampiasa “VTT électrique”. Misy koa ny “endure-extrême” ho an’ireo mpanao “descente”. Misokatra hatramin’ny 15 jona ny fisoratana anarana.
Henintsoa
French