Hiverina ny hetsika anisan’ny goavana indrindra fikarakaran’ny AFT. Hosokafan’ny Mozikara hatrany izany, mialoha ny seho goavambe hataon-dry Agrad sy Ceasar.
Taona vitsivitsy izay no tsy nandray ny “Fetin’ny Mozika” fikarakaran’ny Alliance Française ny teto Antananarivo. Nivoaka kely ny Renivohitra hatrany ny fanamarihana teo aloha. Nampahafantarina omaly, tetsy amin’ ny foiben’ny Yas Madagascar kosa, fa hatao eny amin’ny Canal Olympia Andohatapenaka, ny “Fetin’ny Mozika” amin’ity taona ity. Ny tontolo andron’ny 2 jona mazava loatra, ka hiverina ihany koa ny Mozikara amin’io fotoana io. Sehatra mandehandeha ambony fiarabe izy ity, izay arahin’ireo mpanao “carnaval” mahatratra 300, miainga eo amin’ny AFT Andavamamba, mandalo ny Cenam 67 Ha, Ampasika, Andohatapenaka hatrany amin’ny Canal Olympia.
Efa miandry azy ireo ny sehatra goavana amin’io fotoana io, hafanain’ireo mpanakanto malaza toa an-dry Ceasar sy Agrad. Eo koa ireo mpikosoka kapila toa an’i DJ Mimie sy Jannia Blast’In. Sehatra ho an’ireo mpanakanto vao misondrotra ihany koa izany. Amin’ny maha “Fetin’ny mozika” azy, maimaimpoana ny seho. Vokatry ny fiaraha-miasa amin’ny AFT sy ireo mpanohana toy ny Yas, satria misy sarany ny fikarakarana.
Tsiahivina hatrany fa efa an-taonany maro no nanamarika ny “Fetin’ny Mozika” isaky ny 21 jona isika eto Madagasikara. Fanaon’ny firenena maro maneran-tany izy ity, hankalazana ny maha tsy misy fefy ny mozika, izay fitaovan-tserasera iraisan’ny zanak’olombelona ihany koa. Sehatra iombonan’ny mpanakanto vao misondrotra sy ireo efa kalaza, ho fiombonam-po sy fanahy amin’ireo mpankafy mozika, mba ho maimaimpoana hatrany ny seho.
Zo ny Aina
French