Taorian’ny fivoriana tany Istambul, ny avrily lasa teo, niarahana tamin’ny firenena valo mbola ampian’ny Gavi amin’ny fividianana vaksiny, nisy ny Alliance inter-parlemantaire natsangana. Nentina aty amin’ny firenena tsirairay ny zavatra tapaka tamin’izany.
Tafatsangana taorian’ny atrikasa teny Ambatofotsy, omaly, ny Coalition parlemantaire pour la vaccination. Ahitana ireo vaomiera eny anivon’ny Antenimierampirenena voakasiky ny fanaovam-baksiny izany, ahafahana miara-miasa amin’ny vaomiera momba ny fahasalamana sy ny fandrindram-piterahana. Tanjona ny hampakatra ny tetibola atokana ho an’ny vaksiny satria mbola miankina amin’ny mpamatsy vola ny ampahany betsaka (90%) hividianana sy hanaovana izany eto amintsika. Niitatra amin’ny vaomiera momba ny lalàna, ny mponina ary ny fanombanana ny politikam-panjakana ny mpikambana ao anatin’ny Coalition pour la vaccination izay hanao adisisika eny anivon’ny mpanatanteraka.
« Mandritra ny fivoriana faharoa, ny volana oktobra, eny Tsimbazaza, no handinihina ny volavalolan-dalàna momba ny tetibolam-panjakana taona 2026. Tokony hisy tolo-kevitra entin’ny solombavambahoaka any amin’ny mpanatanteraka mialoha ny fandiniana hitondra fivoarana amin’ny tetibola», hoy ny solombavambahoaka filohan’ny vaomieran’ny Fahasalamana sy ny fandrindram-piterahana, Dr Rajaobelina Lova.
«Efa misy ny lalàna laharana 2016- 058 momba ny fametrahana ny Tahirim-pirenena ho an’ny fanaovam-baksiny efa nolanian’ny Antenimiera roa tonta. Tsy mbola navoakan’ny fitondram-panjakana anefa ny ny didy fampiharana», hoy ny filohan’ny vaomieran’ny Lalàna, Raby Savatsara. Sakana lehibe tsy ahafahana miroso amin’ny famatsiana vola maharitra ny fanaovam-baksiny izany. Niova koa ny zava-misy amin’izao fotoana ka hodinihina raha mbola azo hampiharina ilay lalàna. Miankina amin’ny filana misy eo amin’ny vaomieran’ny fahasalamana izany.
Vonjy
French