Voafehin’ny ekipan’ny sampana mpamonjy voina ara-potoana ny haintrano niseho teny Nanisana, Boriborintany fahadimy, omaly atoandro. Naharay fampahafantarana ny lehiben’io sampana io, tamin’ny 11 ora sy 43 minitra, ka nahetsika avy hatrany ny mpamonjy voina ao Andravoahangy. Minitra vitsy taorian’io, nigadona teny amin’ny toerana nisian’ny firehetana izy ireo. “Ny rihana fahatelo tao amin’ny trano R+3 no niharan’ny fahamaizana. Ny lakozia sy ny toeram-pidiovana no hotohoton’ ny afo”, hoy ny fanazavan’ny lehiben’ny sampana mpamonjy voina Antananarivo Renivohitra, ny kaomandà Eric Olivier Ralaivaonoro. Voafehy ny afo ka tsy niparitaka tamin’ny efitra fandraisam-bahiny sy efitra hafa intsony. Nahetsika rahateo ny ekipan’ny sampana mpamonjy voina Tsaralalàna ka voafehy tanteraka ny afo tamin’ny 12 ora sy sasany. Notsiahivin’ny tomponandraikitry ny sampana mpamonjy voina fa manao izay ho afany hamonjena ny mpiara-belona izy ireo. Nidina ifotony nijery ny zava-nisy teny an-toerana koa ny mpitandro filaminana izay misahana ny fanadihadiana momba ny fototry ny firehetana. Tsy nisy aina nafoy tamin’ity tranga ity.
Tsiferana R.
French