Atao any Francfort, Alemaina, ny fivoriambe iraisam-pirenena momba ny tontolo iainana. Mandray anjara amin’ izany ny delegasionina malagasy tarihin’ny minisitry ny Tontolo iainana sy ny fampandrosoana lovainjafy (Medd), i Andonirina Max Fontaine. Nandritra ny fandraisany fitenenana no nanaovany adisisika ho fandresena lahatra ny mpiara-miombon’antoka sy ny mpandray anjara. Navoitrany sy nomeny lanja ny fiaraha-miasa eo amin’ny Tahirimbolan’ny faritra arovana sy ny tontolo mananaina eto Madagasikara (FPBM) sy ny KFW, izay tohanan’ny BMZ alemà. Naneho ny fahavononany hanamafy ny fiaraha-miasa amin’ny lafiny samihafa ireo mpamatsy vola sy ny mpiara-miombon’antoka entina hanohanana ny fikajiana ny tontolo mananaina eto Madagasikara.
Nohazavaina ny laharam-pahamehan’i Madagasikara, izay notsindrina manokana fa tsy mionona amin’ny fiarovana fotsiny ireo biby na zavamaniry mampiavaka antsika, fa eo koa ny fiarovana ny ala,
ny rano, ny toetr’andro, indrindra ny fanohanana ny velon-tenan’ny mponina eny ifotony.
Mazava ny vokatra andrasana. Nohamafisin’ny mpamatsy vola ny hanohizana ny fanohanany, hisy koa tetikasa vaovao hotohanana. Nankasitrahin’izy ireo ny vina napetrak’i Madagasikara ary ho azo antoka ny famatsiam-bola maharitra hiarovana ny Faritra arovana. Tsapa tokoa fa mahavita mandroso soso-kevitra mahasoa i Madagasikara, fa tsy mionona amin’ny mpangataka famatsiam-bola fotsiny.
Njaka A.
French