Hiditra an-tsehatra, hiady ny ho tompondakan’i Afrika, ho an’ny rugby lalaovin’olona 7 (Can 2025) indray ny Makis Ladies. Misedra olana anefa izy ireo satria tsy mbola voaloa ny saran’ny fandraisana anjara, mitentina 7500 euros. Ankoatra izay, nidera ny fandrosoan’ny rugby sokajy vehivavy eto amintsika ny World Rugby.
Hotanterahina any Kenya, ny 16 sy 17 novambra ho avy izao, ny fiadiana ny ho tompondakan’i Afrika, taranja rugby lalaovin’olona 7. Hiadiana ny tapakila hiatrehana ny “World Series Challenger 2026”. Anisan’ireo firenena hiatrika izany ny Makis Ladies. Nambaran-dRakotomalala Marcel, filohan’ny Malagasy Rugby, tamin’ny mpanao gazety tetsy amin’ny Kianja Makis Andohatapenaka, omaly, fa hatramin’izao tsy mbola voaloa ny saran’ny fandraisana anjara, izay mitentina 7500 euros. “Tokony ho voaloa amin’ny 15 oktobra izao izany”, hoy izy. Koa miantso ny minisitra mitantana vonjimaika ny fanatanjahantena sy ny praiminisitra izy hijery akaiky izany, indrindra ny vola niatrehan’ny Makis Ladies ny Can natao teto Madagasikara farany teo.
Nohararaotin-dRakotomalala Marcel ihany koa ny fotoana nanaovana ny tatitra mahakasika ny fivoriamben’ny World Rugby, natrehiny tany Londres, ny faran’ny volana septambra lasa teo. Tamin’ izany no nanambarany fa resy lahatra ny tomponandraikitry ny Federasionina iraisam-pirenena fa mandroso ny baolina lavalava eto Madagasikara, na ny lalaovin’olona 15 na ny lalaovin’olona 7. Izany no nahazoan’ny Malagasy Rugby fanasana manokana. Ankoatra izay, nisy fampisehoana ny rugby malagasy sokajy vehivavy, nataon’ny dokotera Felana sy i Ando, tomponandraikitry ny rugby vehivavy, tany an-toerana. Teo koa ny nanasana an’i Fenitra kapitenin’ny Makis Ladies, tamin’ny fanokafana ny “Mondial” tao Londres. Araka izany, hanampy ny rugby sokajy vehivavy ny Solidarité olympique. Nampirisika ny teknisianina izy ireo amin’io lalao hataon’ny Makis ladies any Kenya io. Tsiahivina fa efa nahazo ny tapakila hiatrehana io “World Series Challenger” io ny Makis sokajy lehilahy.
Tompondaka
French