Nitarika ny fananganan-tsaina voalohany teny amin’ny Lapam-panjakana Mahazoarivo, omaly, ny praiminisitra, Rajaonarivelo Herintsalama Andriamasy. Nisy hafatrafatra sy toromarika nomeny ho an’ireo mpiara-miasa.
Hentitra sy nahitsy. Anisan’ny nasongadiny tamin’ny lahateniny ny toetra tokony hananan’ny tsirairay eo am-panatanterahana ny asany. Anisan’izany ny soatoavina fototra miisa telo. Eo ny fanajana sy ny fihavanana ary ny fiaraha-mientana. Nasoritsoritany tamin’izany koa ny fomba hitantanana ny raharaham-panjakana. «Hifantohantsika tanteraka ny ady amin’ny kolikoly, anisan’ny tena mampahantra ny firenena. Tsy hisy fandeferana ho an’ireo rehetra mbola mitoetra ao anatin’ny fahalovana sy ny gaboraraka», hoy izy. Nanteriny fa anisan’ny laharam-pahamehana ny famitana ny asa ao anatin’ny mangarahara eo anatrehan’ny vahoaka malagasy.
Fanomezana toerana ireo manam-pahaizana
Nohamafisiny fa anisan’ny lalan-tsaina itondrana fampandrosoana koa ny fanomezana toerana ireo manam-pahaizana. «Afaka hitondra anjara biriky amin’ny fanarenana ny firenena izy ireny », hoy ihany izy. Notsindriny fa anisan’ny foto-kevitra mibaiko ny asa, ny asa, ary ny asa ihany. Ahazoana manarina haingana ny firenena izany, araka ny nambarany. Tombanana fa tsy natao ho an’ireo mpiasa sy tomponandraikitra eny Mahazoarivo ihany izany hafatra izany fa ho an’ny rehetra koa.
Tsiahivina fa fihaonana voalohany nataon’ny praiminisitra, Rajaonarivelo Herintsalamana, tamin’ireo fianakaviamben’ny Primatiora izao, taorian’ny nanendrena azy amin’izany toerana sy andraikitra lehibe sahaniny izany.
Synèse R.
French