Praiminisitra Rajaonarivelo Herintsalama : “Mamarana ny Politika ankapoben’ ny fanjakana aho izao”

“Izaho mbola mamarana ny Politika ankapoben’ny fanjakana (PGE) ho amin’ny fa­norenana ifotony izao. Araka ny lalàmpanorenana izay.
Vo­alazan’ny lalàna koa ny fanaovana fanambaram-pananana”. Io ny fanazavan’ny Prai­mini­sitra Rajaonarivelo Herintsa­lama, tamin’ny mpanao gazety, taorian’ny nametrahan’ny governemanta fa­nambaram-pananana teny amin’ny Fitsa­rana avo momba ny lalàmpanorenana (HCC), Ambohi­dahy, omaly. Nape­traka ny lalàna mifehy ny tetibola. Sa­tria misy ny fivorian’ny Anteni­mieram­pirenena, tokony ho tapitra tamin’ny 31 oktobra ny fametrahana an’izay. Mbola misy asam-baomiera hanitsiana azy. Mba tsy hisian’ny hoe tsy fanarahana ny lamin’ny lalàmpanorenana ny tolona. Tsy nisy an’izany teo. Tsy fa­non­ganam-panjakana iny, fa hetsi-bahoaka nampian’ny mi­a­ramila manam-panahy. Ny sasany niady tamin’ny olona tanam-polo izay nampiasana fitaovana mahery vaika, indrindra mahafaty olona. Tsy ekena izany.
“Miaro ny zon’olombelona hatramin’ny farany aho”, hoy izy. Ao anatin’ny fiarovana ny zon’olombelona koa no hanaovana ny politika ara-toekarena. Tena hanova ny fototry ny toekarena iainana izao. Miandry kely… Mamarana azy izy. Sao vary mohoka no ho voaray. Aleo tena vary masaka no hatolotra. Maninona ny volavolan-dalàna mifehy ny tetibola no tonga dia mivoaka? Eo amin’ny sehatry ny toekarena izy, ka efa fantatra izay tokony hatao ary tsy maintsy vonona hatrany amin’izay iainana. Na tiana na tsia, misy ny fitohizan’ny fanjakana. Ny fifandraisana amin’ny Tahirim-bola iraisam-pirenena (FMI) sy ny Banky iraisam-pirenena (BM) ary ny Vondrona eoropeanina (UE), ohatra: ao anatin’ny fanatanterahana tetikasa i Madagasi­kara. Mitondra zava-tsy ampoizina ny fahatapahan’izay.

R. Nd.