Volana anisan’ny itrangana lozam-pifamoivoizana maro ny desambra. Tao anatin’ny 24 ora, lehilahy iray maty, ankizy dimy naratra. Tompon’antoka ny fiara nipoitra tampoka, nifaoka mpandeha an-tongotra anaty fiampitana.
Maty tsy tra-drano ny raim-pianakaviana tra-doza teo Ankorondrano, omaly alina.
Tompon’antoka tamin’izany ny fiara marika Starex iray nipoitra tampoka ka nifaoka mpandeha an-togotra tanaty fiampitana voatokana. Tsy tafajanona ilay fiara, nifatratra tany amin’ilay lasibatra, raim-pianakaviana 38 taona. Marihina fa avy namangy ny havany, tsy lavitry ny nisehoan’ny loza izy mialoha ny voina.
“Nikasa hody eny Andranomena izy no niharan-doza ka namoy ny ainy izao”, hoy ny fanazavan’ny havany. Mandray andraikitra amin’ny fikarakarana ny razana ny tompon’ny fiara, taorian’ny fifampiresahana teo amin’ny roa tonta, raha ny nambaran’ny fianakavian’ny maty. Tonga teny an-toerana nitrangan’ny loza, nanao ny fanadihadiana ny polisy misahana ny lozam-pifamoivoizana. Naka ny razana sy nanatitra izany teny amin’ny tranom-patin’ny HJRA Ampefiloha kosa ny avy amin’ny BMH.
Mpamily mamo
Vaovao nampivarahontsana teto an-drenivohitra koa no niseho, afakomaly, teny amin’ny lalan’ny Tsarasaotra, Soavimasoandro. Tao anatin’ ny faritra fiampitana ihany koa ny andiana mpianatra no voafaokan’ny fiara. Naratra sy tsy maintsy naiditra hopitaly hatramin’ny omaly ny dimy. Raha ny angom-baovao teny an-toerana sy ny fanazavan’ny polisy nanao fizahana dia noho ny fitohanana no nitarika ny loza. Nisy fiara tsy mataho-dalana iray, nijanona nanakona ny lalan’ny mpandeha an-tongotra. Niampita tsy nisy ahiahy ny ankizy no nisy fiara iray nirimorimo avy any Alarobia hihazo an’i Mamamba.
Raha ny vaovao avy amin’ ny polisim-pirenena hatrany, hita ho mamo ilay mpamily. Nahatratra hatramin’ny 138 mg/ml ny tahan’ny alikaola tao amin’ny vatany.
Renim-pianakaviana
Ankoatra azy eni-mianaka tra-doza, mbola nisy vehivavy iray ihany koa nofaohan’ny moto tsy lavitra teo, afakomaly maraina. Voalaza fa nandeha mafy ilay moto nandona azy izay nandeha am-pilaminana. Mafy ny fifandonana, nanidina ambony, nitontona mafy tamin’ny tany ilay lasibatra ka voatery nentina namonjy toeram-pitsaboana ihany koa.
Mino
French